Shillong, Nailar 27
Ka Hynñiewtrep Youths’ Council (HYC) ha ka Sngi U Blei ka la dawa na ka Sorkar ban pynbiang suloi bad kuli sha ki ’riewpaidbah ha ki jaka khappud khnang ban ïada ïa ka khyndew ka shyiap bad ka jingim lajong lada kam (Sorkar) lah ban phah da ki spah ngut ki pulit sha kitei ki jaka.
“Ngi dawa ba ka Sorkar ka dei ban phah da ki spah ngut ki pulit ha man ki BOP bad OP ha ki khappud ha ryngkat ki tiar ïaleh kiba biang. Ka dei ban ai hukum noh mardor ïa ki pulit ban pyndonkam ïa ki jingpynbthei pynsat khmat, ban tied ban bom bad ban siat ruh lada donkam ban ïada ïa u pud u sam bad ïa ki paidbah ha khappud,” la ong u General Secretary ka HYC, Bah Roy Kupar Synrem ha ka kyrwoh khubor.
Ha kawei ka liang, u la ong ba lada ka Sorkar kam nud ban leh kumtei, kata kan bha ïa ka ban shu ai noh da ki tiar ïaleh kum ki suloi, ki kuli bad kiwei-kiwei ki tiar ïa ki ’riewpaidbah ha khappud khnang ba kin ïada hi noh ïa la ka khyndew ka shyiap bad ka jingim lajong namar kumba long mynta ym i don jingshaniah ha ki pulit ka Jylla.
Haba kren shaphang ki pulit ka Jylla, u Bah Synrem u la kdew ba don ar jait ki pulit – ka kynhun ki pulit kaba bom kput ïa ki paidbah, ki pulit shynrang kiba ktah kti bad bom dusmon ïa ki longkmie, ki pulit kiba don 50-60 ngut kiba ïeng rasong ha ryngkat ki tiar ïaleh kum ki jingpynbthei pynsat khmat bad ki suloi ban ïada ïa ki karkhana jong ki bar jylla, kumjuh ka kynhun pulit kaba shah hukum ha ki heh bar jylla jong ka ‘Topcem’ ban bom kput ïa ki khun Hynñiewtrep.
Ha kajuh ka por, u la ong ba sa kawei pat ka kynhun pulit ka dei kaba don ha khappud (Block-I), Khanduli Sector kiba don kumba 10-15 ngut bad kiba hap ban mareh na ki jaka ap pahara ban ïada la ka jingim namarba ki tieng palat ïoh shah lun maw bad shah siat da ki jri ha ki Karbi.
“Ki jingkylli kiba ngi kwah ban kylli na u Myntri ka tnad kam pohïing ka Jylla, ka long, hato hakhmat ka Sorkar Jylla ka dang kham kor ki karkhana pynjot mariang ne kham kor u pud u sam bad ki khun Hynñiewtrep ba shong ba sah ha Khappud? Balei la buh pulit tang 10-15 ngut ha Khanduli Sector hynrei da ki 50-60 ngut ban ïada ïa ki karkhana pynjot mariang?” la buh jingkylli utei u nongïalam.
U la buh jingkylli ruh ba balei la ai hukum ïa ki pulit ïada karkhana pynjot mariang ban pyndonkam jingpynbthei pynsat khmat, ban bom kput ïa ki paidbah, ban phah ktah kti ha ki pulit shynrang ïa ki longkmie katba ym shym la hukum pat ïa ki pulit ha khappud ban pyndonkam ïa ki suloi, ban ïada ïa u pud u sam ne ban siat jingpynbthei pynsat khmat ïa ki Karbi kiba wan rung shapoh u pud u sam ka Jylla ha Lapangap.
Haba pan jingshai na ka Sorkar bad ka tnat pulit ban jubab halor kitei ki jingjia, u Bah Synrem u la buh jingkylli biang ba hato kitei ki pulit ki phet ba ki tieng ïap bad ba duna briew ne namarba kim ïoh hukum na kiba halor ban bom bad siat ïa ki Karbi kiba thmu pynïap ïa ki bad ki paidbah ha khappud.
“Balei ngi ong ba ki Karbi ki thmu pynïap ïa ki pulit bad ki khun Hynñiewtrep ha Lapangap – ka dei namar katkum ki pulit Meghalaya, lada phi lun maw ne siat da ka jri, kata ka lah dei ka kam thmu pynïap briew bad ïa kata ngi lap lyngba ka jingjia ba dang shen ha Tura ba shah lun maw ka Mini Secretariat,” la ong u General Secretary da kaba bynrap ba ki pulit ki la pynngat kyndon thmu pynïap briew ïa ki paidbah kiba don ha kato ka sngi.
Shuh shuh u la buh jingkylli, “Lada ka Sorkar kam lah ban ai hukum ïa ki pulit ha khappud, te balei pat la ai hukum ban siat jingpynbthei pynsat khmat ïa ki nonghikai, balei la ai hukum ban bom kput da ki lathi ïa ki longkmie ha Lumshnong bad balei la ai hukum ban siat ïap ïa u (L) Cherishstarfield Thangkhiew?”
