Tura, Nailar 27
Ki kynhun seng bapher-bapher bad kynhun ki ’riew rangbah na Ri-lum Garo ki la ther tyngeh halor ki jingkam jong u Myntri Rangbah ka Jylla, u Conrad K. Sangma ba ym don nos kiba bit ba biang na ka thaiñ (Ri-lum Garo) na bynta ki kam ba dang shu pyllait shen hapoh ka National Health Mission (NHM).
Ha shuwa, la pynbiang da ki spah tylli ki kam hapoh ka NHM sha ki nongshong shnong ka Jylla watla ka long kaba lyngngoh ba ym shym la don iwei ruh na Ri-lum Garo.
U Myntri Rangbah ha ka kyrwoh lyngba ka dur khih ha une u taïew ba la dep, u la kam ba kine ki long ki kam kiba hap ban pyntbit kyrpang bad ki donkam ïa ki sap kiba kham pher ïa kaba kito na Ri-lum Garo kim don.
Kumba ka long, ym shym la don kino-kino ki jingpynbna bad ïa ki jingdonkam la pyndap da ka tnad na ki Nursing Hospital bapher-bapher ka Ri-lum Khasi. Baroh kine ki kam ki dei kiba hap hapoh Ri-lum Garo.
Katei ka jingkren ha kawei ka liang ka la pynlong ïa kiba bun ki kynhun seng ban mih shakhmat ryngkat ki jingujor haba ïadei bad ka jingdon jong ki briew kiba la bit la biang na Ri-lum Garo ban pyndap ïa ka jingdonkam.
Ha ka shithi ba la phah sha u Myntri Rangbah ka Jylla da ki kynhun seng bapher-bapher kum ka Garo Graduate’s Union, Senior Citizen’s Forum bad ka New Tura Development Forum ha ka Sngi U Blei, ki kynhun seng ki la kyntait ïa ki jingkam jong u Myntri Rangbah.
Haba pynsngew ba katei ka jingkren ka long ka bym lah pdiang, ki kynhun seng ki la ong ba ki don palat iwei ngut ki kyrtong kiba la bit la biang ha Ri-lum Garo bad kiba la pyndep ruh ïa ki jingpule kiba la pan (GNM bad BSc Nursing). Kine ki kyrtong katkum ka jingpynsngew jong ki, ki la pyndep ïa ki jingpule na ki shlem ai jinghikai kiba paw.
“Baroh ki kyrtong kiba la shah thung kim dei na ka jaidbynriew Garo, ki bym kren ïa ka ktien jong ka thaiñ bad kane kan wanrah jingeh ha ka ban pyndep la ki kamram namar ka jinglong-jingman jong ka kam kaba ki ïoh. Kumjuh, ki kyrtong kim dei ki nongshong shnong ka Ri-lum Garo bad kane kan long mawjynthut ïa ka kam ka jam jong ki ba man ka sngi,” la ong ki kynhun seng ha ka jingujor jong ki.
Na ka liang kitei ki kynhun seng ki sngew ruh ba lada long kaba donkam, ka jingpule lyngkot kaba 6 bnai na bynta ka jingpyntbit ba kyrpang la dei ban leh ha Training Hall jong ka TB Hospital, Tura.
“Kane ka lah ban pyntikna ba kine ki kam ki don na bynta kito kiba ha Ri-lum Garo – kiba la don lypa ïa ka jingtbit ha ka kam. Kaei kaba lyngngoh ka long ruh ba ym shym la don jingpynbna ba la pynmih halor kine ki kam bad ïa ka jingthung (kam) la leh khlem ka jingpyrkhat. Kane ka bym lah pdiang,” la pynpaw ki kynhun seng.
Shuh shuh ki la pynsngew ba kito kiba la shah thung ha kitei ki kam dei ban pynkynriah noh shuwa tat ynda ka Sorkar ka pynmih ïa ka jingpynshai halor katei ka bynta bad balei kito kiba na Ri-lum Garo ki shah pynduh noh ïa ka hok.
Ïa kitei jingthung kam sha ka NHM la pynbna ha ka taïew ba la dep na bynta ki ‘Mid Level Health Provider’ lyngba ka hukum DHSMCH bad FW/NHM/MLHP/20/2023/III ha ka 25 tarik u Nailar.
