Shillong, Nailar 27
Ka Synjuk Nongñiah Taxi Sor bad Khapsor ka la leit ban kitbok ïa u khynnah pule uba la shah tynrah scooty ha Laitumkhrah kaba u dang shah sumar mynta ha GNRC Hospital, Guwahati.
Une u khynnah ba dang pule klas-XI ha St. Edmund’s Higher Secondary School, Shillong u dang mih na klas ban leit noh sha ïing, hynrei ha mar ba u mut jam na shiliang sha shiliang ka surok hajan ka Don Bosco Technical School ha Laitumkhrah u la shah tynrah ha ka Scooty haduh ba un da mynsaw jur na ki bynta ka kjat bad khlieh ha ka 24 tarik mynta u bnai.
Une u khynnah u dei ba shong ba sah ha Mawlai. Kumta, namar ka jingshitom jur ki bahaïing ki la rah noh sha GNRC ha katei kajuh ka sngi bad mynta u la kham ïoh bor, hynrei u dang shitom ka kjat namarba ka la kdiah.
Namar kata, ka Synjuk ki Nongñiah Taxi Sor bad Khapsor hapoh ka jingïalam u President, Bah Kmenlang Khonglah ha ka Sngi U Blei ki la leit ban kitbok ïa une u khynnah uba dang shah sumar ha GNRC Hospital Guwahati.
Haba pynpaw ka jingsngewlem ïa une u khynnah, u Bah Kmenlang Khonglah u la kitbok ïa une u khynnah ba un shait un khlaiñ noh. Nangta u la kyntu ïa ki nongñiah scooty ba ki dei ban burom mar kylliang namar baroh ki kyrkieh ban leit sha ki kam ne sha ki jaka pule hynrei ym dei pat ban tynrah ïa ki briew.
U la ong ba kum kine ki jingjia um kwah shuh ban ïohi ba kiba ñiah scooty kin pynher ha surok khamtam ha ki jaka ba bun briew bad ki jaka ba don ki skul.
Katba u Bah Shimladbiang Rynjah uba dei u Vice-President ka synjuk, u la pynpaw ka jingsngewkmen haba u khynnah uba shah tynrah ha ka scooty u la kham ïoh bor hadien ba la shah sumar ha hospital ha Guwahati.
Namar kata, u la kyntu ïa baroh kiba ñiah scooty ba kin kham husiar ban ñiah ha ki jaka skul khnang ban nym jia shuh nangne shakhmat.
