Shillong, Nailar 27
Ki Regional Committee na Assam bad Meghalaya kiba dei ban peit ïa ki jaka kiba hap ha khappud ka West Khasi Hills district bad Kamrup (Rural) District jong ka Assam kin ïakynduh ha Shillong ha ka Lah Sngi U Blei.
La pynbeit ba ka jingïalang kan long ha Hotel Pinewood ha kane ka nongbah.
U Myntri ka Sorkar Jylla uba dei ruh u Chairman ka Regional Committee na bynta ka West Khasi Hills district, kata, ïa ka thaiñ Langpih u Bah Paul Lyngdoh un lamkhmat ïa ka kynhun na Meghalaya, katba u Myntri ka Sorkar Assam uba dei u Chairman ka Regional Committee u Chandra Mohan Patowary un lamkhmat ïa ka kynhun na Assam.
U Bah Paul u la ong ba u khmih lynti ba ka jingïakynduh hapdeng ki ar tylli ki Regional Committee kan long kaba biang bad ïaid beit, bad hadien ka jingïakynduh ha Shillong, kan don sa ka jingleit peit lang ïa ki jaka la kumno-kumno ha u Risaw.
U la ong ba hadien ka jingleit peit ïa ki jaka sha khappud, ki ar tylli ki Regional Committee kin pynkhreh ïa ka kaiphod ha u Naiwieng bad yn phah sha la ki jong ki Myntri Rangbah.
Hapoh ka Langpih sector, ki don kumba 200 tylli ki shnong, bad u Bah Paul u la ong ba ki don kumba 54 tylli ki shnong kiba dei ban don bad ka Meghalaya ha ryngkat ki kot ki sla kiba biang.
Kumta u kyrmen ba baroh ar tylli ki Jylla kin poi sha ka jingsngewthuh bad yn lah ban pynbeit ïa u pud u sam da ka jingïahun lang baroh arliang.
