Shillong, Nailar 27
Ka Meghalaya Energy Corporation Ltd (MeECL) mynta ka la shem jingeh ban dang lah tei ïa ki projek kiba pynmih bording, hynrei na ka liang ka Sorkar Jylla ka long ba la kloi ban pdiang ïa ki kynhun shimet kiba lah ban tei ïa kino-kino ki projek kiba kham rit kiba lah pynmih bording hapoh 25 mega watt.
Kane ka jingbym lah ka MeECL ka dei namar ka jinghiran pisa nalor ka jingshem jingeh ban pynïaid shakhmat ïa ki projek namar ka jingpyrshah kaba ju mih man ka por haba thmu ban tei ïa ki projek pynmih bording.
Haba ïakren bad u Myntri ka tnat bording ka Sorkar Jylla, u AT Mondal u la ong ba kumba ka long mynta, ka jinglong jingman ka long kaba eh ïa ka Jylla kumba ka long mynta khamtam ïa ka MeECL ban tei projek bording thymmai.
Hynrei u Mondal u la ong ba kane kam mut ne dei satia ba ka MeECL kan nym ïoh shim shuh ïa ki sienjam ban tei projek bording ha kane ka Jylla.
U la ong ba lada ïoh jingïarap lehse ka don ka lad ïa ka MeECL ban tei projek thymmai, hynrei ka Sorkar ka pdiang ïa kino-kino kiba kloi ban tei ïa ki projek kiba rit ban pynmih bording.
U la ong ba nadong shadong ki hap ban tip lut bad ka jingïakut ka long ban ai ei katto katne ka bording sha ka Jylla.
Ki don kumba 16 tylli ki projek kiba rit kiba la dep ithuh ba ki lah ban pynmih bording bad ïa kine yn ieh ha ki riewshimet ban tei lada don kiba wan shakhmat.
U Mondal u la ong ba ki don teng ki riewshimet kiba la phah ïa ka jingtyrwa jong ki sha ka tnat bording haba ïadei bad ka jingkoit jong ki ban shimti ban tei projek bording hapoh 25 MW.
Kum ban pynkynmaw, ka MeECL ka la pyrshang khatduh eh ban pynïaid shakhmat ïa ka Umngot projek kaba dei ban pynmih bording kumba 210 MW, hynrei kane ka projek ka la shu sah noh kumto namar ka jingpyrshah ki trai jaka kiba ju rep shilynter harud ka Wah Umngot.
Kiba pyrshah ïa kane ka Umngot projek ki dei ki paidbah na ka thaiñ Amlarem ha West Jaiñtia Hills district bad Mawkynrew, ha East Khasi Hills district.
Ka Jylla Meghalaya ka don hapdeng ka jingkyrduh bording khamtam namarba kam lah ban tei kino kino ki projek kiba thymmai. Ka jingdonkam bording ilektrik ha Meghalaya ka long kumba 6.67 million unit, katba ka jinglah ban pynmih bording pat ka long tang kumba 3.741 million unit.
