Shillong, Nailar 27
U MLA ka Mawkynrew Constituency, Bah Banteidor Lyngdoh u la pynpaw ka jingsngewkhia kaba jur namar ka jingïai kiew ka jingpyndonkam drok da ki samla ka Jylla katba nang ïaid ki sngi khamtam ha nongbah Shillong.
Une u MLA u la pynpaw ïa kane ha ka jingïalang pynkupburom ïa ki samla pule ka Mawkynrew Constituency kiba la wan shakhmat na ka eksamin SSLC bad HSSLC mynta u snem kaba la pynlong ha Good Shepherd Higher Secondary School, Jongksha ha ka sngi Saitjaiñ ka 26 tarik Nailar.
Ïa kane ka jingpynkup burom la tip kum ka Mawkynrew Academic Excellence Award 2023.
U Bah Banteidor u la ong ba u drok u long ka jingma uba lah ban wanrah ka jingsohsat bad ka jingdum ïa ka lawei ki samla bad un pynjot pynpra ïa ki longïing longsem bad ïa ka imlang sahlang.
U la ong ba ki kmie ki kpa ki trei shitom bad ki shah jynjar ban ïohi ïa la ki khun ba kin pule hynrei bun na ki khun samla ki pyrkhat ba ka lawei kam long kaba shai namar ka jingduna ki lad ïoh kam.
Kumta u la ai mynsiem ïa ki samla pule ba kin ïaid shakhmat ha ki jingpule jong ki namarba ka pule puthi kam dei eh tang ha ka ïoh kam ïoh jam, hynrei kan saiñdur kumno ban lah ban ïakhun ïa kino-kino ki jingeh lyngba ka rai ba skhem.
Ha kawei pat ka liang, u la ong ba ka jingjur ka jingpep skul shiteng por ki samla ka dei namar ka jingbym don ki skul hajan, bad bun ki hap ïaleh ban beh sha Shillong.
“Na ka daw ka jingduna ka ïoh ka kot ki longïing, bunsien ki samla ki hap ban iehnoh shiteng por ïa ki jingpule. Ban weng ïa kane, kum u nongmihkhmat ka constituency nga dang buddien ban pynurlong ïa ka kolej ha kane ka thaiñ na ka bynta ka jingmyntoi ki samla,” u la ong.
Ha kane ka sngi, la sam khusnam sha ki samla kiba la wan shakhmat ha ka eksamin Secondary School Leaving Certificate (SSLC) bad Higher Secondary School Leaving Certificate.
U MLA u la pynkup burom ruh ïa lai ngut ki briew kiba la pawkhmat ha ka imlang sahlang napoh ka thaiñ kiba kynthup ïa u nongïoh khusnam Padma Shree, u Bah Risingbor Kurkalang ha ka liang ka shna tiar tem bad rwai tynrai, ka Kong Sbunbha Kharumnuid na shnong Laitlum kaba ju thoh bad pynmih ha kotkhubor ïa ki poitri Khasi man la ka por, bad ka Dr Amanda A Pakynteiñ, kaba dei ka nonghikai skul step kaba la ïoh khusnam ‘Best Woman Guru Award’ na ka 4th International Inspirational Women Awards (IIWA) mynta u snem.
