Shillong, Nailar 28
Ka Meghalaya High Court ha ka Lah Sngi U Blei ka la bthah ïa ka sorkar jylla ba kan pdiang ïa ka jingthep kam nonghikai jong kawei ka nongshong shnong kaba don jingduna ha ki dkhot met hadien ba ka sorkar ka la kyntait ha ka banyngkong na ka daw ba ka khlem pat ïoh ïa ka syrnod na ka National Institute of Open Schooling (NIOS) ban pyni ba ka la pyndep ïa ka D.El.Ed.
Katei ka nongshong shnong ka la kyrpad ïa ka High Court ba kan bthah ïa ka NISO ba kan ai noh ïa ka syrnod lane ‘Pass Certificate’ ha kaba ïadei bad ka jingpyndep ka jong ka ïa ka D.El.Ed. La pyntip ba la pyndep ïa kane ka eksamin naduh u Risaw 2015, bad ka la ïoh ruh ïa ka ‘mark sheet’, hynrei kaba sah ka long sa tang kata ka syrnod kaba khlem pat ïoh haduh mynta.
Na ka liang u muktiar jong katei ka nongshong shnong u la pynpaw ba ka sorkar jylla ka la pynbna ïa ka byrta halor ka jinglait jong ki kam Assistant Teacher ha Government Lower Primary School ha kaba artylli ki kam la bhah na ka bynta kito kiba don jingduna ha ki dkhot met (Locomotor).
La ong ba katei ka nongmudui ka dei ka briew kaba don jingduna ha ki dkhot met bad ka don ruh ïa ki kyrdan ba biang ban thep ïa kata ka kam nonghikai namar ka la pyndep ïa ka MTET bad ïa ka D.El.Ed. Hynrei tang na ka daw ba ka NIOS ka khlem pat ai ïa katei ka syrnod, ka sorkar ka la pynphai noh ïa ki kot ki sla jong ka jingthep kam jong ka.
Namarkata, u muktiar u la kyrpad ïa ka ïingbishar ba kan ai hukum ban ai ïa katei ka syrnod khnang ba kane ka nongshong shnong kan lah ban ïashim bynta ha ka jingthep kam nonghikai bad ka tarik bakhatduh ban pynpoi ïa ki kot ki sla ka dei 31 tarik Nailar, 2023.
Ka ïingbishar ka la ong ba ki kot ki sla ba la wanrah da ki nongmudui ki long kiba shisha bad ki pynthikna ruh ba ka dei kaba don jingduna ha ki dkhot met (Locomotor Disability). Nalorkata, ka la pyndep ïa ka MTET bad D.El.Ed kaba pynlong ïa ka kaba bit ban thep ïa katei ka kam nonghikai.
Ka ïingbishar namar ka ïohi ba ka nongmudui ka dei kaba don jingduna ha ki dkhot met bad kaba don ïa ka lad ban ïoh kam ïoh jam, ka jingbym ai ka NIOS ïa ka syrnod sha ka, ka la ktah ïa ka jingthmu jong ka ban ïashim bynta ha ka jingthep kam.
Namarkata, ïa mynta shipor, ka ïingbishar ka la ai hukum ïa ka sorkar jylla ba kan pdiang ïa ki kot ki sla jong ka jingthep kam jong katei ka nongmudui khnang ba kan lah ban ïashim bynta ha ka jingpyrshang ban ïoh ïa ka kam nonghikai.
Hynrei ka ïingbishar ka la kren shai ruh ba lada katei ka nongmudui ka ïoh ïa ka kam, ka jingthung kam ïa ka kan long hadien ba ka la pyni ïa katei ka syrnod na ka NIOS.
