Shillong, Nailar 28
Ka Khun Hynñiewtrep National Awakening Movement (KHNAM) ka la dawa ba dei ban pynbeit biang ïa ka kamram kaba la bynshet lane ‘terms of reference’ ha ki dkhot ka Expert Committee namar katkum ka jingbynshet kaba mynta, ka long ban pule ïa ka bhah thungkam kaba la don lypa mynta bad ban ai jingmut ban pynbeit lada i donkam.
Ha ka shithi sha u Chief Secretary ka Jylla, kaba la phah da u President ka KHNAM, Bah Pyndap Saibon bad u General Secretary, Bah James M.A. Neng, ka KHNAM ka la pynpaw ka jinglyngngoh ban ïohi ba ka don ka jingïapher hapdeng ka rai kaba la shim ha ka jingïalang jong baroh ki seng saiñ pyrthei (all party meeting) ha ka 31 tarik Jymmang, 2023 bad ka rai kaba ka Kynhun Myntri ka la shim khamtam haba ïadei bad ka jingbynshet ïa ki kamram (terms of reference) kiba dei ban pyndep da ka Expert Committee.
Ka KHNAM kaba la ïai kdew na ka por sha ka por ïa ki jingduna bad ïai dawa ban pynbeit ïa ka Reservation Policy, ka la pynkynmaw ba dei ha ka jingïalang jong baroh ki seng saiñ pyrthei ba la mynjur ban thaw ïa ka Expert Committee na ka bynta ban khmih bniah ban pynbeit thymmai ïa ka Reservation Policy jong u snem 1972, hynrei ha ka jingbynshet ïa ka kamram pat la phah tang ban shu pule ïa ka Reservation Policy kaba la don mynta bad ban ai jingmut ban pynbeit lada donkam.
Ka KHNAM ka dawa ba ka kamram ba la bynshet ban pyndep (terms of reference) ka Expert Committee, ka dei ban long kaba ïahap bad kaba shai bha, kata ka long, ka Expert Committee kan pyntikna bad peit ïa ki jingai jingmut kiba la ïohpdiang na ki seng saiñ pyrthei, bad ka Expert Committee kan ai jingmut ruh ban pynbeit thymmai ïa ka bhah thungkam.
Ka KHNAM bad ka UDP, ki dei ki seng saiñ pyrthei kiba la dep ai jingmut lypa sha ka Committee kaba khlieh da ka Myntri Sorkar ka Kong Ampareen Lyngdoh haba ïadei bad ka jingdonkam ban pynbeit ïa ka bhah thungkam.
Hynrei ka VPP ka kren shai ba kam treh satia ban ai jingmut, hynrei ka ieh beit ha ka Expert Committee ba kan leh ïa kaba donkam.
Ka KHNAM ka la kdew ruh ba na ka liang ka Kynhun Myntri ka la bynshet ha ka Expert Committee ba kan twad jingmut bad pynlong ka jingïasyllok kaba kham ïar bad kito kiba dei ki nongdonbynta (stakeholders), nalor ka jingleit jngoh ïa ki jaka hapoh ka Jylla na ka bynta ban twad jingmut na kito kiba dei ki nongdonbynta lang.
Haba ïadei bad kane ka bynta, ka KHNAM ka la ong ba ka ïohi ba kane ka bynta kaba ka jingbynshet ha ka Expert Committee ka dei tang ka buit ban pynslem bad ym da donkam ïa ka Expert Committee ban pynlut kai ïa ka por bad ka pisa ban leit jngoh ïa ki jaka ha kylleng ka Jylla.
Ka KHNAM ka la ai jingmut ba ha ka jingshisha dei ban shu ailad beit ïa baroh ki nongdonbynta (stakeholders) ban phah ïa ki jingai jingmut kiba don ha ki sha ka Expert Committee hapoh ka por kaba la buh khnang ba ka Expert Committee kan ïoh pule bad pyntikna ha kaba kan ïoh ruh ban pyndep ïa ki kam tang hapoh 3 bnai.
Shuh shuh ka KHNAM ka la peit thuh ba ha ka jingthung ïa ki dkhot ka Expert Committee, ym shym la don satia ki trai Jylla bad ka la ai jingmut ba dei ban donlang ki trai Jylla kiba dei ki riewshemphang khnang ba ka Expert Committee ruh kan don ka jingsngewthuh ïa kiwei ruh ki bynta kiba ïadei bad ka bhah thungkam bad ki jingkhmih lynti jong ki paidbah.
