Shillong, Nailar 28
Ki ar tylli ki Regional Committee ka Meghalaya bad Assam kiba la ïakynduh ha ka Lah Sngi U Blei ha Shillong ki la rai ban leit jngoh lang ïa ki jaka ha khappud kiba hap ha thaiñ Langpih ha u bnai ban wan, kata, hadien jong ka Dorbar Synrai jong ka Ïingdorbar Thawaiñ jong baroh ar tylli ki Jylla.
Ka Dorbar Synrai jong ka Ïingdorbar Thawaiñ ka Meghalaya kan sdang ha ka 15 tarik Nailur.
Katba ka Dorbar Synrai ka Ïingdorbar Thawaiñ ka Assam kan sdang ha ka 11 tarik Nailur.
Haba kren sha ki lad pathai khubor hadien ka jingïakynduh jong ki ar tylli ki Regional Committee ha Hotel Pinewood, u Myntri Sorkar uba dei u Chairman ka Regional Committee na bynta ka West Khasi Hills district, Bah Paul Lyngdoh, u la ïathuh ba ha kane ka jingïakynduh, la ïakren shaphang ki jaka kiba don jingïakajia bad kiba kam markylliang ha kaba la lah ban kham pynduna ïa ki jaka kiba don ka kynrum-kynram.
Haba kylli katno tylli ki jaka kiba la lah ban weng ïa ki kynrum-kynram da ki Regional Committee, u Bah Paul u la ong ba ym lah ban ïathuh ïa ki jaka namarba ka jingïakren ban pynbeit ka dang ïaid.
Ha kane ka jingïakynduh, na ka liang ka Regional Committee kaba peit ïa ka Kamrup (Rural) jong ka Assam la ïalam da u Myntri ka Sorkar Assam u Chandra Mohan Patowary, uba long u Chairman ka Regional Committee nalor ki MLA, ki Deputy Commissioner bad kiwei-kiwei ki ophisar jong baroh ar tylli ki Jylla.
U Bah Paul u la ong ba ki Regional Committee kin sa leit jngoh ïa ki jaka ha khappud ha shwa ban kut u Nailur kata ynda la kut ka Dorbar Synrai jong baroh ar tylli ki Jylla.
U Bah Paul u la ong ba ki Deputy Commissioner lem bad ki MDC la bynshet ba kin ai ka thup kyrteng ki jaka ha kaba baroh ar tylli ki Regional Committee kin sa leit jngoh ïa ki jaka bad ïakynduh ïa ki nongshong shnong.
Na ka liang u Bah Paul bad u Patowary kim pat ïathuh katno tylli ki jaka kiba ïa kam markylliang hapdeng kine ki ar tylli ki Jylla namarba ka jingïakren ka dang ïaid.
U Patowary u la ong ba ki jingïatai ha kane ka jingïakynduh ki long kiba seisoh bad u kyrmen ba yn sa lah ban pynbeit lyngba ka jingïakren.
Haba kylli katno tylli ki shnong kiba ka Assam ka pyni ba ki hap bad ka, bad ha kano ka rukom ka jingpynbeit kan long, u Patowary u la ong ba ïa mynta ka bha ban nym pat batai katno tylli ki jaka ki don tat haduh ban da leit jngoh ïa ki jaka.
U Patowary u la ong ruh ba ym dei ban khuslai namarba ym don kano-kano ka bym lah ban pynbeit lyngba ka jingïakren.
“Ngi ïakren kum shipara bad ngi ïoh ban ïatai na ka bynta ba ngin lah ban poi sha ka thong ban lah ban pynbeit,” u la ong.
