Shillong, Nailar 28
Namar ka jingkiew than ka bai thang bording kaba la pynlong ïa ki paidbah ba kin ud kin nam, na ka liang u Bah Disparsing Rani uba dei u nongwad RTI ba paw khmat ka jylla u la leit ban pan da ka RTI na ka shlem treikam jong ka Meghalaya Energy Corporation Limited (MeECL) ha ka 27 tarik u Naitung 2023 ha kaba ïadei bad ka jingïoh lum ka bai thang bording tang jong u bnai Rymphang 2023.
Haba kren sha ki lad pathai khubor ha ka Lah Sngi U Blei hadien ka jingïoh jubab RTI, u Bah Disparsing u la ong ba katkum ka jubab kaba u la ïohpdiang na ka tnad MeECL ka long kaba sngewlyngngoh shikatdei eh ban ïohi ba ka jingïohlum bai thang bording da ka MeECL na ki 5 tylli ki distrik ha Rilum Garo ka long tang T.10 klur ha ka shi bnai sha katei ka tnad, katba ka jingïoh lum ïa ka bai thang bording na ki 7 tylli ki distrik ka Rilum Khasi bad Jaiñtia ka long haduh T. 81 klur.
U Bah Disparsing u la ong ba katkum katei ka RTI la paw ba ka don kaei-kaei sha lyndet ban ïoh lum bai thang bording tang T. 10 klur ha ki 5 tylli distrik jong ka Rilum Garo ha ka shi bnai.
“Kata ka dei ka ïitkhmih kaba u paidbah u dei ban tip, lehse ka lah ban long ba shatei kim siew bai thang bording lane ka lah ban long ba kim don nongtrei bad ïa kata ngim lah ban kynnoh ïano-ïano tangba katkum kane ka RTI, ka paw ba ka don eiei sha lyndet ba ngi ïoh synñiang tang katne na ki 5 tylli ki distrik”, la ong u Bah Disparsing.
U Bah Disparsing u la ong ba ka RTI ba ar kaba u la wad ka dei halor ka jaka jong ka MeECL. Katkum kane ka RTI kaba u la ïoh ka long ba ki don 144 tylli ki jaka jong ka MeECL ha ka jylla bad 6,861 acre ha ka jingheh.
U Bah Disparsing u la ong ba u Chairman jong ka Managing Director jong ka tnad u la pyntip ba ka MeECL ka hap thied bording na kiwei ki kompani ha ka dor T.8 shi unit bad die pat sha ki paidbah ha ka dor T.5 shi unit hynrei don pat ki kompani kiba die bording sha ka tnad tang ha ka dor T.3 shi unit.
