Jowai, Nailar 28
Ka Dorbar Shnong Lapangap ka la kyrpad ïa ka sorkar jylla ban buh da ka Police Battalion ha u Lum Moopyrdet Pynthor Lapangap khnang ban ïada ïa ki nongshong shnong na kano kano ka jingjia ba sngewsih bad ruh ban don ka shong suk shong shngaiñ ha ka shnong ka thaw.
Ïa kane ka jingkyrpad, ka Dorbar Shnong Lapangap ka la pynsngew ha u Deputy Commissioner jong ka West Jaiñtia Hills u Bah B.S. Sohliya ha ka jingwan ïakynduh ïa u ha kamra treikam ha ka Lah Sngi U Blei.
U Waheh Shnong ka Lapangap, u Bah Deimonmi Lyngdoh ha ka jingïakynduh u la pyntip ba ha ka 12 tarik Naitung ha ka por kumba 12:00 mynsngi bad ha ka 18 tarik Nailar ha ka por kumba 1:00 mynsngi, ki pulit Assam bad ki paidbah Karbi ki la wan ban leh bor bad pynjot pynpra ïa kumba 5000 tylli ki tynrai dieng ba la thung da ka shnong Lapangap ha u lum jong ka shnong uba kyrteng u Lum Moopyrdet Pynthor Lapangap ba hap hapoh ka Elaka Shiliang Myntang, West Jaiñtia Hills.
Katba ha ka 26 tarik Nailar ha ka por kumba 2:00 nohphai sngi ka sorkar Assam ka la buh syndon da ka ktem Police/Battalion Camp ha kane ka jaka jong ka shnong, la pyntip u Waheh Shnong.
U la ong ba halor kane ka jingleh jubor jong ki pulit Assam bad ki nong Karbi ïa ka jaka jong ki ka wanrah ïa ka jingma bad ka jingshongsyier ïa ka shnong ka thaw bad khamtam ïa ki paidbah nongrep kiba rep ba riang ha kane ka jaka.
Shuh shuh da ka jingbuh ka sorkar Assam ïa ka Police/Battalion Camp, ki nong Karbi ki dang ïohlad shuh shuh ban pynjot pynpra ïa ki tynrai dieng ba la thung da ka shnong bad ban klun ïa ki jaka rep jaka riang, bad ki hali pynthor jong ngi.
Kumta ka Dorbar Shnong ka la kyrpad ïa u DC ban shimkhia ban ïakren bad ka sorkar Assam ban kynriah noh shi syndon ïa ka Assam Police/Battalion Camp na katei ka jaka khnang ban wanrah ïa ka shongsuk shong shngaiñ ha ka shnong ka thaw bad khamtam ïa ki paidbah nongrep kiba rep ba riang ha kane ka jaka ban lait na kano kano ka jingïakynad bad ki jingjia ba sngewsih.
