Jowai, Nailar 28
Ka Hynñiewtrep Integrated Territorial Organization (HITO) West Jaiñtia Hills ha ka Lah Sngi U Blei hapoh ka jingïalam u President u samla Wanbiang Pulang ki la leit ban tah ïa ki jingthoh ha kylleng ka sor Jowai bad sha kiwei kiwei ki bynta jong ka West Jaiñtia Hills ban buh ka jingkyntu ïa baroh ki dukan kiba die dewbilat ba kin ym die shuh ïa ka dewbilat TOPCEM tat haduh ban da lah ban pynbeit ïa ki jingkular kiba la mih ha ka 24 tarik Nailar kaba dei ka sngi ba la pynlong ïa ka jingpynsngew paidbah halor ki jingthmu jong ka kompani ba shna ïa ka dewbilat TOPCEM ban pynïar ïa ka jingshna dewbilat jong ka.
Lah ban kdew ba ha katei ka sngi, ka la mih ka jingïakynad hapdeng ki paidbah bad ki pulit bad ki la don ruh ki nongtrei ka kompani kiba la kynshoit ïa ki pulit ban tied ban bom ïa ki paidbah ha Thangskai, East Jaiñtia Hills.
Kane ka jingkynshoit jong kitei ki bar jylla ka la pynbitar ïa ka HITO bad ïa kiba bun kiwei pat bad kane ka seng ka la ong ba katei ka jingjia ka pyni ba ki bar jylla ki la sdang ban leh trai bad sngew trai ha kane ka Bri U Hynñiewtrep.
Namarkata, ka HITO ka la ong ba kum ki nongshong shnong kiba don ïa ka jingkitkhlieh, ki dei ban ïasnohkti lang bad ka seng ha ka jingpyrshah ban thied bad pyndonkam ïa ka dewbilat TOPCEM ha baroh kawei ka Bri U Hynñiewtrep.
