Shillong, Nailar 28
U Vice-Chancellor (VC) ka North-Eastern Hill University (NEHU), Shillong, u Prof. Prabha Shankar Shukla ha ka Lah Sngi U Blei u la khot ïakren ïa ka Meghalaya College Teachers’ Association (MCTA) ban pynbeit ïa ki jingsngewkhia kiba ka seng ka don halor ka National Education Policy, 2020 (NEP-2020).
U Prof. Shukla haba kren halor ka jinglong-jingman ba kynthup ïa ka MCTA bad ka jingïakhih (Non-Cooperation Movement) jong ka seng, u la ong ba na bynta ka bha ka miat jong ki samla pule kiba saphriang ha kylleng ka Thaiñ Shatei Lam Mihngi, u la kyrpad ïa ka MCTA ban pyrkhat biang halor ka lynti ba ka seng ka la shim, la ong ka kyrwoh na u Public Relations Officer (PRO) ka NEHU, Dr. Davidson Pyngrope ha ka kyrwoh khubor.
Nalor kane, u VC u la pynpaw ïa ka jinglong kloi ban ïadon bynta ha ka jingïamir jingmut kaba tei ban pynbeit ïa ki jingsngewkhia bad wer ruh ïa ka MCTA sha ka jingïakren ban poi sha ka rai ha ka lynti jong ka jingïabeit lang.
Ha kawei ka liang u VC u la ai jingïaroh ïa ka jinglong kloi jong ki kolej ba la pynïasoh bad ka skulbah ban ïaid shakhmat bad ka ‘Four-Year Undergraduate Programme’ (FYUP) kumba la ïohi jngai da ka National Education Policy 2020 (NEP 2020).
Hapdeng ka jingsdang jong ka samoi pule 2023-24, ka NEHU bad ki kolej ba pynïasoh bad ka, ki la shim ïa ka sienjam jong ka jingkylla ha ka jingïaid lynti ha ka pule-puthi ban pynbha ïa ka jinglong-jingman jong ka jingpule ba shajrong hapoh ka Jylla.
Hapoh ka jinglamkhmat u Prof. Shukla, ka NEHU ka la pynbna ïa ka jingsdang jong ka FYUP ba la pynbeit ryntih katkum ka NEP-2020, ha ryngkat ka thong ban kyntiew ïa ki kyrdan jong ka pule-puthi kumjuh ban ïarap ha ka roi ka par jong ki samla pule ha baroh ki liang.
Ka kyrwoh ka ong ruh ba katba ki 45 sngi banyngkong jong ka samoi pule ki la ïaid, u VC u la pynpaw ka jingsngewhun halor ka jingpdiang lang jong kane ka jingwanrah jingkylla da ki kolej ba la pynïasoh bad ym don wat tang kawei ruh ka kolej ka ban pynkynriah ïa ka jingpyntreikam ïa ka NEP.
Na ka liang u Prof. Shukla u la kner ïa ka jingsngewnguh sha ki bor pynïaid kolej na bynta ka lynti ba bha ba ki la shim ban pyntikna ïa ka jingïaid beit ïaid ryntih jong ka FYUP.
Ha kajuh ka por, u la ai khublei ïa ki Principal jong ki kolej halor ka bynta ba ki la shim – kiba long ka bynta ba kongsan haba ïadei bad ka jingïaid shakhmat bad kane ka kam, ha kawei ka liang kaba la ïalam sha ka rai ban kynthup ïa ka FYUP.
Shuh shuh u Prof. Shukla u la pynbna ba ki bynta ba ïadei bad ki jingkhmih bniah, ha ryngkat ki ‘Ordinance’ bad ki kyndon ki ban pynïaid ïa ki kam ki jam, shen yn sa phah sha ki kolej ba pynïasoh bad ka skulbah.
