Shillong, Nailar 29
Ka Meghalaya Energy Corporation Ltd (MeECL) mynta ka leh tyngeh ban ïoh lum ïa ka bai bording ilektrik na kito kiba pynsahteng khlem pat siew, bad mynta ka la beh ram sa ïa ki kompani mobile kiba pynïeng mobile tower ha kylleng ki jaka jong ka Jylla namar ki khlem siew ïa ka bai bording ilektrik.
Ka tyllong khubor ka ïathuh ba ka MeECL ka la dep phah da ki jingthoh lane ‘showcause notice’ sha baroh ki kompani mobile kiba pynïeng mobile tower halor ka nongrim ba kine ki kompani ki dei ban shah ot noh ka bording ilektrik namar ki khlem pat siew ïa ka bai bording ilektrik kaba ki la pyndonkam.
La ïathuh ba kine ki kompani mobile ki pynïeng ïa ki mobile tower ha kumba 200 tylli ki jaka ha baroh kawei ka Jylla.
Ki don ki kompani kiba la pynïeng palat ban ïa uwei mobile tower ha kaba ki siew shwa ïa ka bai ilektrik tang ïa uwei u tower bad ki pynsahteng noh ïa uwei pat.
Kumta ka MeECL haba ka phah jingthoh ban pan jingshai (showcause notice) na kine ki kompani mobile, ka la pynrung lang noh hajuh ïa ki tower kiba la dep siew ïa ka bai bording ilektrik bad ki tower ba khlem pat siew namar ka don ka kyndon ba kine ki kompani mobile kin shah ot ka bording lada ki siew tang ïa uwei u tower.
Kumba ki kompani mobile kim ju map ne ailad ïa ki nongpyndonkam mobile haba la kut ka por (validity), ka jingleh jong ka MeECL ka long ruh kum ka jingbym ailad ïa kine ki kompani bad ka dei ka jingpynbor ba kin siew noh ïa ka bai bording ilektrik haba pyndonkam ïa ka bording da kine ki mobile tower.
Namar kata, ka MeECL ka la ai por ïa kine kompani mobile 45 sngi haba ïadei bad ka jingpan jingshai lyngba ka jingthoh kaba la buh jingkylli ïa ki, balei kim dei ban shah ot ka bording haba ki khlem pat siew ïa ka bai bording ilektrik.
