Shillong, Nailar 29
Ka por ban pynphai ka Meghalaya Energy Corporation Ltd (MeECL) ïa ka bording kaba la shim kylliang na kiwei pat ha ki bnai kiba rang tyrkhong ka mariang kan dei ha ka 15 tarik Risaw.
Kumta ka MeECL kam pat lah ban weng noh shisyndon ïa ka jingpynlip bording mynta namarba ïa ka bording kaba pynmih mynta, la hap ban pynphai noh shwa sha kito kiba la ai bording ïa ka Jylla ha kito ki bnai ba rang tyrkhong, ha kaba la shim kylliang ïa ka bording na ki ban lait na ka jingpynlip bording ha kito ki bnai.
Na ka liang ki bor ba dei khmih ki la pynshai ba wat lada ka jingdon ka um ha pung Umïam ka la kham biang, hynrei kam mut ba ka bording ilektrik ha Jylla ka la pahuh.
Ka jingpynmih bording ha Meghalaya ka long tang kumba 3.741 million unit katba ka jingdonkam ïa ka bording ka long haduh 6.67 million unit.
Ha kawei pat ka liang, ka MeECL kan pynduna shuh shuh ïa ka por pynlip bording ilektrik ha ki jaka nongkyndong da kaba pynhiar sha ka 3 kynta na ka 5 kynta.
Halor ka jinglip khah-khah ka bording ilektrik ha thaiñ Nongpoh bad Ri Bhoi District, ka MeECL ka la shim ki lad ki lynti ban tan ïa ka KV laiñ na Byrnihat ban poi sha Nongpoh Sub Station, hynrei ka don ka jingeh ha kumba 200 mitar namar ym ïoh jaka ban pynïaid ïa ka laiñ.
“Ka jingeh ha thaiñ Nongpoh ka dei namarba ka thut ka rukom sam bording ym dei satia ba pyntreikam ïa ka jingpynlip bording kumba la shah kynthoh,” la pynshai ki bor ba dei khmih ka MeECL.
