Shillong, Nailar 29
U Symbud Myntri Rangbah uba dei u Chairman ka Regional Committee na bynta ka West Jaiñtia Hills, Bah Sniawbhalang Dhar u la ong ka shnong Lapangap kam hap ha ka jingïakajia pud bad ka Assam.
U la ong ba kam don ka jingïakajia pud haba ïadei bad ka Lapangap bad na ka liang ka Sorkar Meghalaya ka la buh 2 platoon ki bor pahara ha khappud bad ka jinglong jingman ka don ha ka jingpeitngor.
Haba kylli halor ka jingdon kiba wan kyntur pud sha Lapangap, u la ong ba ka Regional Committee kan sa khmih bha ïa kane.
U Bah Sniawbhalang Dhar u la ong ba ka jingjia kaba jia ka dei kham shajngai na ka shnong Lapangap.
U la ong ba ïa ki Regional Committee la thaw khnang da ka Meghalaya bad Assam na ka bynta ban khmih ïa ki jaka kiba donkam ban pynbeit bad ban poi sha ka jingpynbeit kaba pdiang lang baroh arliang.
U la ong ba ki Regional Committee na baroh ar ki Jylla ki la dep jurip dang shen ha ki jaka kiba don jingïakajia bad lada donkam, yn leit jurip biang ïa ki jaka.
Ki Regional Committee kin sa phah ïa ki kaiphod sha ki Myntri Rangbah baroh ar ngut.
Halor ka jingdon kiba kren khluit bad pynshit ban ai suloi ïa kiba sah ha khappud, u Bah Dhar u la ong, “kiei kita kiba ong. Ki lah ban kren katba ki kwah hynrei ka Sorkar kan leh kaei kaba dei bad kaba bha tam na ka bynta ki paidbah.
Halor ka jingong ka Karbi Students’ Association (KSA) ban wanrah ïa ka jingjia kum ha Manipur, u Bah Sniawbhalang Dhar u la ong ba mano-mano ruh lah ban kren laitluid hynrei ka Sorkar kan leh kaba bha.
Kumta u Bah Sniawbhalang Dhar u la kyntu ruh ïa kiba leit sha khappud ban nym leh kano-kano kaba lah ban pynmih ka kynrum-kynram bad mih ka jingthut ha ka suk ka saiñ.
