Shillong, Nailar 29
U Chief Executive Member ka KHADC, Bah Pynïaid Sing Syiem ryngkat ki EM, u Magistrate na shlem treikam ka Deputy Commissioner East Khasi hills, ki pulit ka East Khasi Hills District, u Syiem ka Hima Mylliem lem bad ki Myntri ki la leit jurip ïa ka Ïewduh ha ka Sngi Ba-ar ka 29 tarik Nailar, 2023.
Ïa katei jingjurip la sdang na jaka ïeng kali na khlieh Ïewduh ha kaba la ïakynduh nyngkong bad ki ophisar ka Meghalaya Urban Development Agency (MUDA) kiba peit ïa ka parking namar ka jingjaboh kaba long kum ka jaka riehtngen ki nongleh kam sniew.
Hadien kata la ïaid sha Them Mawlong bad pynkut ha Motphran.
Kane ka jingleit jurip ka long shi bynta ban wanrah ïa ka khuid ka suba ha Ïewduh bad ban pynbha ïa ki bording ha ka por mynmiet, ki CCTV khnang ban shngaiñ ki nongshong ïew bad nongleit nongwan.
Haba ïakren bad ki nongthoh khubor, u Bah Pynïaid u la ong ba ka jingwan jurip ka long ban wanrah ïa ka jingshngaiñ bad ka jingïada ïa ki paidbah nongleit nongwan bad ki nongshong die dukan ha Ïewduh bad kaba ar ka long ban wanrah ïa ka khuid ka suba.
“Ngi la ïoh ka jingujor na ki ’riew paidbah ba kam shngaiñ shuh haba leit sha Ïewduh namar ki bun ki nongriehtngen kiba leh ïa ki kam sniew, kaba la pynlong ïa ngi ban wan peit da la ki jong ki khmat ïa ka Ïewduh” u la ong.
Nalor nangta u la ïathuh ba ka jaka ïeng kali ha khlieh Ïewduh ki don saw tylli ki mala, hynrei ki don ki mala kiba ym lah shuh ban rung namar ka jingdum wat ha ka por mynsngi kaba pynshlur ïa ki nongleh kam sniew ba kin wan riehtngen.
Shuh shuh u la pynpaw ruh ka jingsngewkhia halor ka jingngop ki samla ha ki jingdih pynbuaid. Kumta u kyrpad ïa ki ophisar ka MUDA ba kin wanrah ïa ka jingshai hapoh ka jaka ïeng kali ha khlieh Ïewduh namar ki nongleh kam sniew kin kham duna khnang ban shngaiñ ïa kiba wan sha ïew.
Namar kata, ban wanrah jingshngaiñ ha katei ka jaka, u la ong ka KHADC kan sa mang pisa na ka 15th Finance Commission ban buh da ki bording ban shai ha ka por mynmiet bad ban buh ruh ar tylli ki kali ban kit ïa ki jaboh na kane ka ïew.
