Shillong, Nailar 29
Ka Voice of the People Party (VPP) ha ka janmiet jong ka Sngi Ba-ar ka la leit sa sha Mawlai ban pynrung kyrteng ïa ki paidbah khnang ba kin long noh kum ki dkhot ba pura jong ka seng.
Ha kane ka sngi pynrung kyrteng kaba la pynlong ha Mawlai Nonglum la ïadon lang da u MLA ka Mawlai u Bah Brightstarwell Marbañiang, u Bah Adelbert Nongrum MLA North Shillong konstitwensi, u Bah Ardent Miller Basawïawmoit kum President ka VPP uba dei ruh MLA ka Nongkrem lem bad kiwei kiwei ki nongkitkam jong ka seng .
Hashwa ban pynlong ka jingpynrung kyrteng ïa ki paidbah sha ka seng, na ka liang u Bah Brightstarwell bad Bah Ardent ki la ai jingkren ban pynshai sha ki paidbah halor ki nongrim jong ka seng.
Haba ai jingkren na ka liang u Bah Brightstarwell u la ong ba katno u sngewkmen ba ki nong Mawlai haba ki jied ïa ki nongmihkhmat kim jied da ka mynsiem kaba sngewieid hynrei ki pyndonkam da ka bor jabieng bad kane ka dei kawei ka mat ba ka seng ka ju pynsngewthuh ha man ki jingïalang ha kino kino ki jaka.
Nalor nangta u la ong ruh sha ki paidbah kiba wan pynïasoh ba ka VPP ka don ar tylli ki nongrim kiba skhem ka long ban wanrah ïa ka synshar ka khadar kaba khuid kaba suba bad kawei ka long ban pynneh ïa ka hok longtrai kum ki trai ri trai muluk la ha ka synshar khadar ne ha ka ktien ka thylleij ha ka jingngeit ne ka jinglong trai ha ka khyndew ka shyïap.
Na ka liang u Bah Ardent M Basaïawmoit u la ong ba ka seng VPP kam dei tang ka seng saiñpyrthei ban mih ïakhun ïa ka ilekshon, hynrei ka dei ruh ka seng ban saiñdur bad ban thaw thymmai ïa ka jaidbynriew bad ban wanrah ïa ka jingkylla ïa ka ri bad jaidbynriew .
U la ong ba ki konstitwensi ban pynjop ïa ki kyrtong ka VPP ki dei hok ban sngewsarong ba ki la pynjop ïa ki kyrtong namar ki nongkyrshan ka VPP ki dei kiba khampher na kiwei pat ki seng saiñpyrthei.
Nalor nangta u Bah Ardent u la ong ruh ba kam pat don kawei ruh ka seng saiñpyrthei naduh ba la ïoh ïa la ka jong ka jylla kaba lah ban pynurlong ïa ki jingkular kiba la kular ha ka por ilekshon, hynrei ka VPP ka la pynurlong ïa kawei ka jingkular ka long ban pynkylla ïa ka bhah thung kam thung jam hapoh ka jylla
Wat la ka seng la la jop mar shiteng ïa ka jingdawa hynrei kim pat hun ïa ka expert committee ba la thaw da ka sorkar da kaba ong ba hapoh shi snem ka sorkar kan buh por. Halor kane ka seng kan ai da ka jingthoh sha ka sorkar ba kane ka mat kam dei kaba kyllaiñ bad hapoh 6 bnai kan ai por bad ka la biang. Hadien kata ka seng kan pynlong sa kawei ka jingïakhih ka dei halor ka jingpynlut phut palat ka sorkar nalor ka jylla meghalaya ka dei kaba duk tam hapoh ka ri.
