Shillong, Nailar 29
U nongwad RTI napoh ka thaiñ Panaliar Jowai, u Bah R.K Rymbai ha ka Sngi Ba-ar u la buh por lai sngi ïa u Executive Engineer (EE) ka tnat PWD Roads Shangpung Division, u Bah D Tariang ban ai jubab ïa ki jingkylli jong ka RTI lym kumta un ujor sha ka ophis jong ka State Information Officer pyrshah ïa utei u EE.
Haba kren sha ki lad pathai khubor, u Bah R.K Rymbai, u la ïathuh ba ha ka 15 tarik u bnai Rymphang 2023, u la pan da ka RTI na u EE ka tnat PWD Roads Shangpung Division, u Bah D. Tariang ha ryngkat ki jingkylli ba kynthup ki kyrteng jong ki kontraktor, ka kam ba la mang, ka pisa ba la pyllait sha ki kontraktor na ka bynta u bnai Jylliew, Nailur bad Nailur 2019 bad naduh u bnai Nohprah haduh Jylliew 2022 hynrei na ka liang u EE u la kyntait ban jubab ïa kine ki jingkylli namar ki kyndon jong ka Sec 8 (i) of the RTI Act 2005.
“Hadien ka jingwad bniah halor ka jinglong jingman ki surok hapoh ka thaiñ Shangpung Division, ngi sngew ba ka long kaba donkam ban wad bniah, haduh katno ka tnat PWD ne ka sorkar ka pynlut ban aiti ïa ki kam maramot surok man u bnai namar kum ba ïohi mynta ki surok ki long kiba la jot bha”, la kynnoh u Bah Rymbai.
U Bah Rymbai u la ong ba kane ka jingpan RTI na u EE ka PWD (Roads) Shangpung Division kadei namar u la don jingthmu ban ujor sha ka Meghalaya State Lokayukta namar kumba la paw ka don kaei kaei sha lyndet namar ki surok hapoh kane ka thaiñ ki long kiba la jot bha.
“Namar kane lada u EE PWD (Roads) Shangpung Division u Bah D. Tariang um lah ban jubab ïa ka RTI hapoh lai sngi ngan ujor ïa u sha ka ophis State Information Officer namar une u EE u la pynkheiñ ïa ka aiñ RTI Act 2005”, la ong u Bah Rymbai.
