Khliehriat, Nailar:
Ka KSU Narpuh ha ka 25 tarik ka la leit sha shnong Brichyrnot da ka jingthmu ban ïashim bynta ha ka jingpynsngew paidbah ba la pynlong da ka Meghalaya State Pollution Control Board (MSPCB) halor ka jingkwah jong ka M/s Green Valley Industries Ltd ban ïoh tih khyndew ha Brichyrnot.
Ka KSU ha ka kyrwoh ba ka la phah ka la pynpaw ka jingsngewlyngngoh ba ha ba ka seng ka la poi ha katei ka jaka ha ka por 11:00 baje mynstep, ka la ïoh jingtip ba ka jingpynsngew paidbah ka la wai noh, kaba mut ba ka jingpynsngew paidbah ka la sdang ha ka por 10 baje mynstep katba ha ka jingpynbna la ong ba yn sdang 11 baje mynstep.
Ka KSU ka la ong ba kam ïoh shuh ban ïashim bynta ban pynsngew ïa ka jingmut halor ka jingktah ne bym ktah ïa ka mariang bad kynnoh ba katei ka jingleh jong ka Meghalaya State Pollution Control Board ka don kaei-re-kaei sha lyndet.
Ka la ong ba seng kam lah ban pdiang da lei-lei bad ka MSPCB kan hap ban pynlong biang da kawei ka jingpynsngew paidbah namar shibun ki paidbah ne ki ‘riew pawkhmat kiba kwah ban ïashim bynta kim ïoh shuh bad ki la pynpaw ka jingsngewlyngngoh bad jingsngewdiaw.
Shuh shuh ka la ong ba haba ka seng ka la wad jingtip la shem ba ïa ka ‘dara’ ne ‘pandal’ ba la shna dei tang ka dur, hynrei ïa ka jingpynsngew paidbah la pynlong hapoh ïing shnong ne Community Hall.
Namar kata, ka KSU ka la ong ba lada ka Sorkar ka ai jingbit ïa katei ka kompeni ban khlong khyndew na katei ka jaka bad lada jia ba pynjaboh ïa ki um ba don sawdong, kum ka Wah Umtalen bad Wah Lukha, ka seng kan pynsangeh ïa katei ka Shell Mines.
