Shillong, Nailar 29
Shi kynhun ki briew kiba la sngewthuh ba ki lah ban shah kem halor ka jingtohkit kaba ïadei bad ka jingpynïaid be-aiñ ïa ki karkhana thang dewïong ha kane ka jylla, ki la ïoh jamin lypa na ka Meghalaya High Court khnang ba kin lait na ka jingshah kem ha ka Sngi Ba-Ar.
Hynrei ka High Court ka la ai jamin lypa ïa kitei ki briew ha ryngkat ki kyndon kiba ki hap ban bud. Mynta ka sngi, ka ïingbishar ka la ai hukum halor ka jingpan jamin lypa lane ‘Anticipatory Bail’ jong kitei ki briew hadien ka hukum ba la wan na ka Supreme Court.
Kitei ki briew ki la pynpaw ba ki lah ban shah kem ha kaba ïadei bad ka jingpynïaid ïa ki karkhana thang dewïong be-aiñ ha ka jylla. Haba peit bad bishar ïa ka jinglong jong ki nongrim ba kitei ki briew ki la shah kynnoh, na ka liang ka High Court ka la ong ba ïa mynta, ka lah ban ym pat donkam ïa ki pulit ban kem ïa kitei ki briew.
Hynrei haba ai jamin lypa ïa ki, ka High Court ka la bthah ba ki dei ban ai ïa ka ‘bond’ kaba T. 10,000/- ryngkat bad u nongbah khlieh na ka bynta kaba kum kane kajuh ka dor. Ïa kane dei ban pyndep hapoh shi taïew naduh mynta ka sngi ha ïingbishar u Chief Judicial Magistrate, West Khasi Hills.
Nalorkata, kitei ki briew kiba la ïoh jamin lypa kin hap ban bud ïa ki kyndon jong ka Section 438(2) jong ka Code of Criminal Procedure, 1973. Ka High Court ka la pynpaw ruh ïa ki nombor ‘Mobile Phone’ jong kitei ki briew khnang ba lada donkam, kitei ki briew kin hap ban ïathuh ha kaei ka jaka kaba ki don.
Ha kajuh ka por, ka High Court ka la ong ba kitei ki briew kiba la ïoh jamin lypa kim lah satia ban mih na Meghalaya lait noh sa tang lada ki leit sha Assam. Lada ki leit sha Assam palat hynñiew sngi, kin hap ban pyntip lypa shwa ïa u pulit uba tohkit halor ka jingtreikam jong kitei ki karkhana thang dewïong be-aiñ.
Lada don ka jingpynkheiñ ïa ki kyndon ba la buh, kitei ki briew kin duh noh syndon ïa ki jingmyntoi ba ki la ïoh na kane ka hukum jong ka High Court.
Shuh shuh lada ka sorkar jylla ka ïoh ïa kino-kino ki jingthoh ne sabut pyrshah ïa kitei ki briew bad lada donkam ban tohkit ïa ki, ka sorkar ka lah ban leit sha ïingbishar ban kyrpad ban weng noh ïa katei ka jamin ba la ai mynta ka sngi.
