Saphriang ka ‘video’ ba shah tim sih u DC East Jaiñtia hadien ba shah ktah kti u nongñiah kali

Katkum kane ka ‘video’, la kynnoh ba u nongbud pahara jong u DC u la shoh la dat ïa u nongñiah jong kawei ka kali haduh ban da mih snam. 

Khliehriat, Nailar 29

Uwei u pulit pahara jong u Deputy Commissioner ka East Jaiñtia Hills District u la shah kynnoh ba u la jrong kti bad shoh ïa uwei u nongñiah kali ha surokbah National Highway 6 hadien ba ka la don ka dheng kali ha ki bynta ka shnong Wahïajer bad Lumshnong ha ka Sngi Ba-Ar.

Halor kane ka jingjia, la ring dur da ki video bad pynsaphriang kylleng sawdong mynta ka step ha kaba la ïohsngew ba u Deputy Commissioner, u Abhilash Baranwal, IAS, uba la don lang ha ka por jong katei ka jingjia, u la shah tim da ka ’tien sih ’tien sang.

Katkum kane ka ‘video’, la kynnoh ba u nongbud pahara jong u DC u la shoh la dat ïa u nongñiah jong kawei ka kali haduh ban da mih snam. U nongring ‘video’ u la leit buh jingkylli ruh ïa u DC halor ka jingshah shoh jong une u nongñiah kali.

Na ka liang u DC pat, u la ai da ka jingthoh halor katei ka jingjia, bad u la kynnoh ba uta u nongñiah kali u la buaid kyiad. Ha kajuh ka por, u la kubur ba uta u nongbud pahara u la ktah kti ïa uta u nongñiah kali.  

Ha u kyrwoh khubor, u Baranwal u la ong khnang ban lait na ki jingartatien bad sngewthuh bakla halor kane ka ‘video’ halor kaei kaba la jia ha surok National Highway 6 hajan ka shnong Wahïajer mynta ka sngi, u la don ha lynti ban leit ïashim bynta ha kawei ka prokram jong ka skul Divine Words Secondary School, Lumshnong bad ruh na ka bynta ka jingïalang bad u Project Director, DRDA, East Jaiñtia Hills, Block Development Officer, Lumshnong C&RD Block bad baroh ki Gram Sevak bad BTA jong ka Block.

Hynrei, u la ong ba ka la don ka dheng kali kaba shyrkhei ha kane ka surok NH-6 naduh Thangskai haduh Wahïajer namar ka jingdon jong ki katto katne ki kali kiba sniew ha kiba bun ki jaka ha surok.

U la ong ruh ba u nongñiah ïa ka kali jong u, u la ai dak khnang ban ïoh ban ïaid shakhmat, hynrei u la ngat ha ka jingshah tim shah tla ha uwei u nongñiah jong ka kali Mahindra Camper Pick up kaba don ïa u nombor ML 11 4554 kaba ïaid nakhmat. Hynrei, na ka liang u nongñiah jong u um shym la pynsngap satia, hynrei u la bteng ban ai dak, hynrei kane ka kali kam shym la ailad satia.

Hynrei, katba u nongbud pahara jong u, u dang pynïaid ïa ki kali na ka liang jong u (DC) u la kyntu ïa u nongñiah ïa ka kali Mahindra ba un pyllait lynti. U DC u la ong ba dei ha kane ka por la shem ba une u nongñiah jong katei ka kali u la don hapdeng ka jingbuaid bad la bthah ïa u ba un pynkynriah ïa ka kali sharud. Hynrei kane ka jingkyrpad jong u DC ka la long lehnohei namar la kynnoh ba uta u nongñiah u la kren khor pynban.

Shuh shuh u DC u la ong ruh ba ka la don ka jingpyrshang ban shim noh ïa u shabi na utei u nongñiah khnang ba un ym lah shuh ban ïaid shakhmat. Hynrei ïa kata ka jingleh, u nongñiah u khlem ailad satia.

Ha kata ka por, u DC u la ong ba u pulit uba pahara ïa u, u la wan ha katei ka jaka bad ban ïada ïa u, namar ka dei ka kamram jong u, u la pyndonkam da ka bor met kaba malu-mala tang ban pyllait ïa u DC na uta u nongñiah kali.

Hynrei, u la ong ba la mih shi kynhun ki briew kiba la ker ïa u bad ïa uta u pulit pahara bad ki la pyndonkam da ki kyntien khlem akor watla u DC u la pyrshang ban pynshai ïa kaei kaba la jia. Ym tang ba ki la tim la tla, hynrei u DC u la ong ba ki la pyrshang ban khanglad ïa ka kali jong u ban ïaid shakhmat.

Dei tat haduh ban da wan ki pulit ba ka kali jong u DC ka la ïoh ban ïaid shakhmat, u la ong. U la ïathuh ruh ba ïa u nongñiah jong katei ka kali Mahindra Camper Pick Up la ïalam sha hospital ban phah peit bniah, bad u DC u la ong ba la pynshisha ba uta u nongñiah u la don hapdeng ka jingshong shit kyiad bad um long satia uba bit ban ñiah kali ha kato ka por.

U la ong ruh ba ka jingmih jong katei ka dur khih kaba la saphriang kylleng kan ktah ïa ki sienjam ba la shim na ka bynta ka jingshngaiñ bad jingbha jong kiba bun kiba la ïaid ha katei ka lynti.