Shillong, Nailar 29
Ka jingthmu ban pyntreikam ïa ka National Education Policy (NEP), 2020 ha ki kolej kiba don hapoh ka jylla ka la pynlong ban mih artylli kynhun, kita, ka kynhun kaba la mynjur ban pyntreikam ïa ka NEP bad kawei pat kaba ong ba ym dei ban kyrkieh ban pyntreikam ïa ka NEP namar kane kan sa wanrah shibun kï jingeh ïa ki khynnah bad ïa ki jaka pule.
Hapdeng kane ka jingkulmar bad ka jingpyrshah, ka la pynlong ruh pat ïa ki nonghikai, ki khynnah pule bad ïa ki kmie ki kpa ba kin dap da ka jingkulmar thlim namar haduh mynta ki kolej bapher bapher kiba don hapoh ka jylla kim pat sdang satia ban shim ïa ki klas jong ki.
Haba kren sha ki lad pathai khubor ha ka sngi ba ar, uwei u rangbah uba dei u kpa jong ki khynnah pule bad uba dei ruh ha kajuh ka por u Rangbah Shnong jong ka Mawlyndep, u Bah Jinu Kharbuki u la ong ba ka la don kumba shi bnai ba ki kmie ki kpa ki la pynrung klas ïa ki khun jong ki ha ki kolej bapher bapher, hynrei haduh kam pat don kano-kano ka jingshim klas kaba pura ïa ki khun ki kti jong ki na ka daw ba ka Meghalaya College Teachers Association (MCTA) ka don hapdeng ka jingïashrut bad u Vice Chancellor ka North Eastern Hill University(NEHU), u Prof. Prabha Shankar Shukla.
U Bah Kharbuki u la ong ba kane ka jingkulmar kaba mih ka long ba hato ki jaka pule kin pyntreikam da ka rukom kaba rim lane da kaba thymmai.
“Shano ka lawei ki khun jong ngi? Mynta ngim tip shuh la ngin ïaid da ka ‘old system’ lane da ka NEP bad mynta ki khun jong ngi ki don hapdeng ka jingklumar jingmut”, la ong u Bah Kharbuki.
Na ka liang jong utei u rangbah u la ong ba kum u kpa u sngewïahap ba dei ban pyntreikam noh ïa ka NEP namar ba ka la kham ïar khnang ba kan long ka jingmyntoi na ka bynta ka jingstad bad ka jingpule jong ki khynnah.
U la ong ba kum u kpa uba kren na ka bynta ki khun ki kti bad ka lawei ba phyrnai jong ki khun ki kti, u kwah ba ka MCTA kan ïa pynbeit mardor noh ïa kane ka jingbym sngewthuh jingmut bad u VC ka NEHU khnang ban ïoh pyntreikam noh shen ïa ka NEP hapoh ka jylla.
U la ong ba kiba bun ki jylla jong ka Ri India ki la dep ban pyntreikam ïa ka NEP katba hapoh ka jylla Meghalaya ki dang kwah shi kwah ïa ka rukom long kaba rim kaba pynlong ïa ka jylla ba kan sahdien shi sahdien.
“Shano ka lawei ki khun jong ngi? Bad shano ka jylla jong ngi bad ki samla jong ngi? Ha ka jingshisha ngi dei ban ai mynsiem ïa ki khun samla kiba pule ba kin ïoh ïa ka jingtip bad ka jingnang kaba ïar katkum ba la buh da ka NEP ba la pynkhreh da ki riewstad”, la ong u Bah Kharbuki.
U la ong ba kum ki kmie ki kpa jong ki khynnah pule u la kyntu ïa ka sorkar bad ïa kiba dei khmih ba kim dei ban shongkli kti halor kane ka mat hynrei u la ong ba kum u kpa u kwah ba ka sorkar kan pynmih beit da ka hukum sha baroh ki kolej ba ki dei ban pyndonkam beit noh ïa ka NEP khnang ba ki khun ki kti kin ïoh jingmyntoi.
U la ïai ban jur ruh da kaba ong ba hapoh ka jylla, ka jingpas IAS jong ki samla Khasi ka dei naduh u snem 2011 bad ka daw jong kane ka dei namar ba kim don ka jingnang jingtip kaba ïar bad u la ong ba lehse, hadien ka jingpyntreikam ïa ka NEP hapoh ka jylla kin sa mih bun ki Khasi ki ban long IAS bad ha kata ka por ym donkam shuh ban wanrah da ki briew kiba nabar bad kane kan long ka jingïohnong na ka bynta ka jylla.
U la ong ba lada pyntreikam nyngkong ïa ka NEP hapoh ka jylla, kin don ki jingeh kiba bun rukom namar haba wan ki jingkylla, ki jingeh ruh ki don hynrei ngi dei ban ïaleh ïa kita ki jingeh bad u la ong ba kane ka NEP kam dei kaba dang thymmai hynrei na ka liang ka sorkar pdeng ka la dep ban pynmih ïa kane naduh u snem 2020.
“Ka sorkar ruh ka dei ban shimkhia ïa kane watla ngi sngewthuh ba ki bun ki jingduna bad ki jingeh bad ki jingdonkam kiba bun hynrei ka sorkar ka dei ban kular ïa baroh ki jaka pule ba ïa ki jingdonkam, yn shimkhia da ka sorkar,” la ong u Bah Kharbuki.
Shuh shuh u la ong ba ki don kiwei kiwei ki kolej ha ki katto katne ki distrik kiba la pyntreikam ïa ka NEP hynrei u la ong ba balei pat hapoh Shillong ki dang ïaksaid, ïataiñia bad ïatei pop iwei ïa iwei.
Namar kata, u la kyntu ruh ïa kiwei kiwei ki kmie ki kpa ba ki dei ban ai lem ka jingkyrshan halor ka jingpyntreikam ïa ka NEP khnang ba ka jylla Meghalaya kan long ka jylla ka ban ïakhun lang bad kiwei ki jylla ha ka jingnang jingstad.
