Shillong, Nailar 30
Ka District Magistrate ka East Khasi Hills, Kong Rosetta Mary Kurbah, ha ka Sngi Balang ka la pynjari da ka kyndon 144 CrPC ban mana ïa ka jingïalum briew hajan jong ka Meghalaya Secretariat bad ka ïing sah u Lat (Raj Bhavan).
Ka Kong Kurbah ha ka hukum, ka la ong ba ïa ka jingpynjari ïa katei ka kyndon la hap ban leh namar ki bor distrik ki la ïoh jingtip ba ki kyndon ki kynhun kiba thmu ban pynlong ïa ki jingïakhih ha ki bynta bapher-bapher jong ka distrik.
Ka District Magistrate ka la ong ba lada shah ïa kitei ki jingïakhih ban long ha ki jaka ba la mana lane kata ka ‘No Procession or Assembly Zone’, kan wanrah ïa ka jingthut ha ka ïaid ka ïeng jong ki briew bad ki kali ruh kumjuh bad ka lah ruh ban ktah ïa ka shongsuk shongsaiñ.
Nalorkata, ïa kiba kum kita ki jingïakhih, ym ju ïathuh lypa lane ïoh jingbit na ki bor ba dei khmih. Namarkata, ka Kong Kurbah ka la ong ba la mana hapoh ka kyndon 144 Cr.PC ïa ka jingïalum briew ha kano-kano ka jaka kaba hapoh 200 metre na Meghalaya Secretariat bad Raj Bhavan.
La mana ruh ban pynlong ïa ka jingïaid paidbah hapoh 200 metre na Meghalaya Secretariat bad Raj Bhavan. Ha kajuh ka por, la mana ban rah ïa ki tiar pynmynsaw. Hynrei la ong ba kane ka hukum kan ym treikam satia na ka bynta ki pulit pahara.
Kino kino kiba pynkheiñ ïa katei ka hukum kin sa shah pynshitom katkum ka kyndon 188 IPC, la ong ka Kong Kurbah.
