Shillong, Nailar 30
Ka Khasi Student’s Union (KSU) Narpuh Circle ka la dawa ba dei ban pynshitom da kaba tyngeh ïa kito ki pulit kiba donkti ban shoh briew khamtam ïa ki kynthei ha ka sngi ba la pynlong ïa ka jingtian bishar paidbah ne ka ‘Public Hearing’ jong ka Meghalaya Cement Limited ha Thangskai, East Jaintia Hills Hills.
Ha kaba ïadei bad kane, ka KSU Narpuh Circle ha ka Sngi Balang hapoh ka jingïalam u President samla KS Suchiang ryngkat ki dkhot bad nongïalam na ka District Unit ki la leit ban ai da ka jingujor ejahar (FIR) hapoh ka shlem treikam jong u Superintendent of Police (SP) ka East Jaiñtia Hills ban pynshitom ïa ki pulit kiba donkti ban shoh briew ha katei ka jingtian bishar paidbah kaba la long ha ka 24 tarik mynta u bnai ha Thangskai.
Ka KSU ka la pynkynmaw ruh ha ba katei ka jingjia ha katei ka sngi, ki pulit ki la shoh bad sympat lathi khlem jingmap wat ïa ki kynthei khynnah ruh. Katkum ka hok longbriew manbriew (Human Rights) ym lah satia ban pdiang ïa kane ka jingleh riewkhlaw (police brutality) ki briew ba bat ïa ka aiñ, la ong ka seng bad ong ruh ba ka aiñ ka dei ban pynshitom ïa baroh kito kiba donkti, ka aiñ kam dei ban theh shiliang, ka dei ban long mar katjuh (equal) la u barit ne bakhraw.
Nalor nangta, ka seng ka pynrem ruh ïa ki MLA jong ka thaiñ kiba la sngap jar-jar khlem kren eiei ban ïada ïa ki paidbah lane ban dawa ïa ka hok jong ki paidbah kumba ki kren kob ha ka por ba ki ïalap ilekshon ban ïadon ryngkat bad u paidbah lada ki shah thombor pyrshah ïa ka hok jong ki.
