Jowai, Nailar 30
Ka Dorbar Shnong Lapangap ha ka sngi Balang ka la leit ban ïakynduh ïa u Symbud Myntri Rangbah (Deputy Chief Minister) ka jylla u Bah Sniawbhalang Dhar uba dei ruh u MLA ka thaiñ halor ki jingeh ba ki ïakynduh na ka jingshah pyndik na ka por sha ka por ha ki pulit Assam bad paid Karbi.
U Waheh Shnong Lapangap Bah Deimonmi Lyngdoh ha ka jingïakynduh bad u Symbud Myntri, u la ïathuh ba ki la ïohlad ban pynsngew ha u ïa ka jingdonkam ban buh ktem pulit ha ka shnong Lapangap ha ka jaka kaba la tip kum ka Lum Moopyrdet Pynthor Lapangap ban shngaiñ ki nongshong shnong.
Nalorkata, ka Dorbar Shnong Lapangap ka la pynsngew ruh ïa ka jingshah jynrat ki tynrai dieng ïa kiba ka shnong Lapangap ka la thung ha u Lum Moopyrdet Pynthor Lapangap.
Ka Dorbar Shnong ka kyrpad ruh ïa u Symbud Myntri Rangbah ban kynriah noh shisyndon ïa ka Assam Police/Battalion Camp kaba la buh da ka Assam.
U la ïathuh ba na liang u Symbud Myntri Rangbah u la kular ban ïakren ïa kane ka mat lashai ka sngi bad u Myntri Rangbah ka jylla u Conrad K Sangma.
