Shillong, Nailar 30
Ka Dorbar Synrai jong ki MLA kan long san sngi ha kaba lai sngi ka dei na ka bynta ban pyndep ïa ki kam kiba dei na ka liang ka Sorkar bad ar sngi la mang na ka bynta ki kam shimet kiba dei ban leh da ki dkhot ka Ïingdorbar Thawaiñ.
Ka Dorbar Synrai kan sdang ha ka 15 tarik Nailur bad ïa ki sngi ban pynlong dorbar san sngi la mynjur da ka Business Advisory Committee (BAC) jong ka Ïingdorbar Thawaiñ kaba la pynïaid da u Lamphang, u Thomas A Sangma.
Ha kane ka jingïalang jong ka BAC la wan ïashimbynta lang da u Symbud Myntri Rangbah, Bah Prestone Tynsong uba dei u Myntri ka tnat Parliamentary Affairs nalor u MLA ba la kham rim bad kham rangbah, Bah Charles Pyngrope nalor kiwei kiwei ki MLA kiba dei ki dkhot ka BAC.
Ki sngi kiba la mang ban pyndep kam na ka liang ka Sorkar hapoh Ïingdorbar ha kane ka Dorbar Synrai ki long ha ka 15 tarik, 20 tarik bad 22 tarik Nailur.
Katba ki sngi kiba la mang na ka bynta ki dkhot ka Ïingdorbar hapoh ka Dorbar ki long ha ka 19 tarik bad 21 tarik Nailur.
Ki kam shimet jong ki MLA hapoh Ïingdorbar ki kynthup ïa ka jingwanrah ïa ki mat ban ïatai bad jingwanrah ïa ki aiñ-rew nalor kiwei kiwei.
Ki kam na ka liang ka Sorkar ki long ban pan jingmynjur ïa kiba bun ki aiñ kiba thymmai bad ki aiñ kiba donkam ban wanrah katto katne ki jingpynkylla.
