Shillong, Nailar:
U nongaibuit sha ka tnad pule-puthi ka Sorkar Jylla, Bah H.M. Shangpliang ha ka Sngi Ba-ar u la ong ba ka Sorkar Jylla ka dang pyrkhat ban pyntreikam ïa ka National Education Policy (NEP) wat ha ki kyrdan pule Secondary bad Higher Secondary.
U Bah Shangpliang haba kren sha ki lad pathai khubor u la ong ba ka Sorkar ka la dep thaw ïa ka Meghalaya State Education Commission (MSEC) bad ki don ruh kiwei-kiwei ki komiti kiba la pynkhreh lypa ba kynthup ïa ka ‘Textbook Review Committee’ (TRC).
Katkum ka jingïathuh jong u, ka komiti (TRC) kan hap ïaid lyngba kiba bun ki jingai jingmut ki ban hap pynsngew sha ka Sorkar Jylla ban wanrah ïa ka ‘Syllabus’ bad ‘Curriculum’ bathymmai ryngkat ka kot pule (textbook) ka ban kynthup ïa kiba bun ki lynnong ba ïadei bad ka Jylla.
U la ong ruh ba ka la don ka jingpyrshang ban wanrah ïa ki kot ka NCERT lyngba ka MBoSE.
Ha kawei ka liang, u la ong ba ka jingpyntreikam ïa ka NEP-2020 ka la sdang ha ki kyrdan pule jong ki kolej bad pynpaw ruh ba ki kolej bapher-bapher ki la ïaid shakhmat bad ka jingpyntreikam ïa kane ka mat treikam bathymmai.
“Kumjuh, kane kan sa hiar ha ka kyrdan jong ka skul, Secondary bad Higher Secondary. Mynta ka jingpynkhreh ka la sdang,” u la ong.
Halor ka jingpyrshah jong ka NEHUTA bad MCTA ïa ka rai ba la shim da ka NEHU ban pyntreikam ïa ka NEP naduh ka samoi pule mynta u snem (2023-24), u la ong ba ïa kane yn ieh ha ka jingstad jong u Vice-Chancellor ka NEHU ban pynbeit naba u la ïoh jingtip ba u VC u la khot ïakren ïa ka MCTA.
Shuh shuh u Bah Shangpliang u la bynrap ba ka Sorkar ka la dep kren shai lypa halor ka mat ba ïadei bad ka NEP.
Ka North-Eastern Hill University Teachers’ Association (NEHUTA) ka la ai por 5 sngi ïa u Vice-Chancellor (VC) ka North Eastern Hill University (NEHU), u Prof. P.S. Shukla ban weng noh ïa ka shithi kaba la pynmih ha ka 12 tarik u Naitung, 2023 haba ïadei bad ka jingpyntreikam ïa ka National Education Policy (NEP) 2020, na bynta ka samoi pule 2023-24.
Kumjuh na ka liang ka Meghalaya College Teachers’ Association (MCTA) ka la sdang da ka jingïakhih ‘Non-Cooperation Movement’ (NCM) naduh ka 1 tarik u Nailar kum ka dak ban pyrshah ïa katei kajuh ka bynta.
