Tura, Nailar 30
Ki kynhun seng ba paw ka Ri-lum Garo ha ka Sngi Balang ki la kdew ïa ki jingdkoh bapher-bapher haba ïadei bad ka jingthung kam ba dang shen jong ka MLHP bad ha ryngkat ka jingdawa pynshitom ïa kito kiba donkit ha katei ka kam, ki la kyntu ruh ïa ka Sorkar ban pynsangeh shuwa ïa ka jingthung kam na bynta ki kam kiba sah thylli.
Lait noh kito kiba na ka jaidbynriew Garo, ki don 41 ngut ki kyrtong kiba la shah thung kam dang shen haba ïadei bad ka MLHP ha ka hukum ba la pynmih da u Mission Director. Baroh kitei kiba la shah thung kin hap shakri ha ki distrik bapher-bapher ka Ri-lum Garo.
Ki kynhun seng ba kynthup ïa ka FKJGP, ADE, AYWO, FAF bad GSU hapoh ka jingïalam u Zikku Balgra N. Marak ki la phah shithi sha u Myntri Rangbah ka Jylla, u Conrad K. Sangma kaba kdew ïa ki jingdkoh bapher-bapher, ha kawei ka liang kaba ïalam sha ka jingpynkheiñ ïa ka rukom thung kam kaba ju long barabor.
“Ngi la wad bniah bad lap sa kawei ka jingthoh (Vide Memo No.DHS/MCH&FW/NHM/MLHP/20/2023(II)), ba la pynmih ha ka 11 tarik mynta u bnai ha kaba la bthah ba kum shi bynta ban pyndap ïa ki jaka bathylli jong ka MLHP ha ki Health & Wellness Centre, ki kyrtong kin hap ban ïaid lyngba ka jingpynshisha ïa ki kot ki sla bad jingïasyllok ha ka 17 tarik mynta u bnai. Hynrei haduh mynta, ngim shym la lap ïa kano-kano ka jingthoh haba ïadei bad ka ‘Advertisement’ na bynta kitei kiba la kdew haneng – kaba ngi ngeit ba ka dei ka jingpynkheiñ ïa ki kyndon ka rukom thung kam kiba la don lypa ba la buh da ka Sorkar Jylla,” la ong ki kynhun seng.
“Ngi la ïoh jingtip ba ka Indian Nursing Council (INC) ka la phah shithi sha baroh ki kolej pule nos ha kylleng ka India ha ka 29 tarik u Jymmang, 2019 ha kaba baroh ki kolej B.Sc. Nursing kin hap ban pynïasohlang ïa ka jingpule Middle-Level Health Provider (MLHP) ha ka B.Sc. Nursing bad ‘Curriculum’ ka Post B. Sc. Nursing. Ngi la ïoh pdiang ïa kiwei ki shithi wat na u Secretary, ka Sorkar India ka tnad ka koit ka khiah, Nirman Bhawan, New Delhi-110011. Hynrei hadien ba la pule bniah ïa ki shithi, ngim shym la lap kano-kano ka jingkdew ba ki nos GNM kim long kiba bit ba biang na bynta ka kam MLHP,” la ong kitei seng.
Haba kdew ba ki samla pule GNM bad BSC hashuwa, la thung na bynta ki kam MLHP hapoh ka Jylla, kitei kynhun ki la ong ba u Mission Director u la shu leh ha la ka mon haba ïadei bad katei ka jingjia ba dang shen bad kyrpad ba un shah tohkit.
“Wat hapdeng ki jingpyrshang jong ngi, ngim shym la lap ïa ka jingpynbna na bynta ki kam ka MLHP haba ïadei bad ka Memo No. DHS/MCH&FW/NHM/MLHP/20/2023/(III), tarik, 23.08.2023 kaba kdew shai ba u Mission Director khlem ka jingkitkhlieh u la ïaid pyrshah ïa ki kyndon thung kam jong ka Sorkar Jylla bad leh ha la ka mon. Kumta u dei ban shim ka jingkitkhlieh halor kine kiei-kiei, ha kawei ka liang kaba lah ban ïalam sha ka jingbym ïasngewthuh jingmut hapdeng ki nongshong shnong ka Jylla bad kumta dei ban leh eiei namar ki jingleh jong u,” la ong kitei seng.
