Shillong, Nailar 30
Ka jinglut ban tei ïa ka Ïingdorbar Thawaiñ ka Jylla ha Mawdiangdiang kan kiew sha ka T.200 klur na ka T.141.14 klur kaba la mang mynshwa.
U Lamphang ka Ïingdorbar Thawaiñ u Thomas A Sangma u la ong ba ka la don ka jingkiew ka dor jong ka jingtei ïa ka Ïingdorbar bad ïa ka jingmang pisa la leh thymmai bad la dep mynjur da ka High Powered Committee (HPC).
U la batai ba kane ka jingkiew ka dor ka dei namar ki jnit ki jnat kiba don ha kane ka jingtei kaba heh.
Nalor kane, u la batai ba ka madan hapoh ïing jong ka Ïingdorbar ka kham rit mynshwa, hynrei mynta ka la kham heh bad kane ka ïahap bad ka jingkiew ka jingmang pisa kaba la kiew ym na ka daw jong ka jingshim por, hynrei na ka daw jong ka jingpynheh ïa ka jingtei.
Ka jingtei ban pyndep ïa ka Ïingdorbar ka la shim por namar ka jingkhyllem ka tnum pyllun (dome) ha ka 22 tarik Jymmang, 2022.
Halor ka jingtei ïa ka tnum pyllun, u Lamphang u la ong ba ka jingtei ïa ka tnum pyllun kaba thymmai ka la sdang bad la pynbeit thymmai da kaba kham sting ka jingkhia ym kum kaba mynshwa kaba don ïa ka jingkhia haduh 3,000 metric ton.
Namar kata, u la khmih lynti ba ka jingtei ïa ka Ïingdorbar kan dep noh hapoh shisnem ei ei.
