Shillong, Nailar 30
Ka Meghalaya Energy Corporation Limited (MeECL) ka la leh tyngeh ban ïohlum ïa ka pisa kaba khlem pat siew ïa ka bai bording ilektrik da kaba ïakhun mukotduma ha Ïingbishar bad Tribunal na ka bynta ban ïoh ïa ka pisa kaba kot sha ka 140 klur.
Ki la don kumba 30 tylli ki mukotduma kiba ïakhun da ka MeECL kiba kynthup ha Ïingbishar, MSERC bad National Law Commission Tribunal (NCLT).
La ïathuh ba kawei ka jingmudui ka dei lyngba ka NCLT ha kaba ka MeECL ka dang dei ban ïoh kumba T. 52 klur ka bai thang ilektrik kaba la pynsahteng da kawei ka karkhana shna nar rod ha Byrnihat kaba kyrteng ka M/s Kamakshi.
Kiwei pat ki mukotduma ki don kumba 30 tylli kiba ïakhun ban ïoh ïa ka pisa kaba pynsahteng.
Kumta lada kheiñ lang ïa ki mukotduma kiba ïakhun ban ïoh ïa ka bai bording ilektrik ki la kot sha ka T.140 klur.
Nalor kitei, ka MeECL ka la beh ram ruh ban ïoh noh ïa ka pisa na ki mobile tower kiba la pynsahteng khlem siew ïa ka bording ilektrik.
