Pynrem jur ka Synjuk ki Waheh Shnong halor ka jingshah kren khlemakor u DC ka EJH

Ka Synjuk ki Waheh Shnong ka East Jaiñtia Hills District ka pynpaw ïa ka jingsngew kyndit bad sngew bynñiaw kaba jur ban ïohi lyngba ki lad pathai khubor halor ka jingshah tim shah tla bad...

Khliehriat, Nailar 30

Ka Synjuk ki Waheh Shnong ka East Jaiñtia Hills District ka pynpaw ïa ka jingsngew kyndit bad sngew bynñiaw kaba jur ban ïohi lyngba ki lad pathai khubor halor ka jingshah tim shah tla bad ka jingshah kren khlemakor jong u Deputy Commissioner (DC) ka district ha ki katto katne ki briew kaba la jia ha ka sngi Ba-ar ha ka surok National Highway 6 hajan ka shnong Wahiajer.

            Ka synjuk hapoh ka jingïalam u President Bah H Nongtdu ryngkat ka jingïadonlang u Dr. P Nongtdu bad katto katne ngut ki ’riew pawkhmat jong ka thaiñ ha ka Sngi Balang ki la leit ban ïakynduh ïa u Abhilash Baranwal, IAS, Deputy Commissioner ka East Jaiñtia Hills District, Khliehriat ban pan jingpynshai halor katei ka jingjia kumba la sakhi lyngba ki lad pathai khubor.

            Hadien ka jingpynshai u DC, na ka liang ki nongïalam jong ka Synjuk ki Waheh Shnong bad ki rangbah ba pawkhmat jong ka thaiñ ki la pynpaw ka jingsngewdiaw halor kane ka jingshah kren kynthoh jong u DC da ki kyntien khlem akor kaba pyni ïa ka jingbym burom shuh ïa ki ’riew rangbah khamtam ïa u khliehduh jong ka district.

            Kumta na ka liang ka synjuk ka pynrem ïa kane ka jingjia khlem da thew ïa ki jingduna jongno-jongno bad ka kyntu ruh ba nangne shakhmat kiba kum kine ki jingjia kim dei ban wan jia shuh.

            Ha kajuh ka por ka synjuk ka kyrpad ruh ïa ki para nongshong shnong jong ka district ban wan sha ka jingïasngewthuh jingmut ïa kaei-kaei kaba la jia bad ban klet ïa katei ka jingjia khnang ban wanrah ïa ka roi ka par bad burom jong ka district.