Shillong, 30 Nailar
Ka Dorbar Shnong Lapangap kaba hap hapoh Nartiang Konstitwensi, West Jaiñtia Hills Distrik ka la rai ban nym ailad ïa ki Karbi kiba sah sha jylla assam ban wan knieh ïa ka jaka kaba ki la dep thung ïa ki tynrai dieng.
Ka shnong ka la dep thung palat 50,000 tylli ki tynrai dieng ha ka 5 tarik u Jylliew mynta u snem kaba dei ka sngi rakhe pynneh mariang ba la ai da ka Basin kaba dei jong ka sorkar jylla.
Kum ban shu pynkynmaw, ki Karbi ki la wan phut palat 50,000 tylli ki tynrai dieng ha katei ka shnong. Ka sien nyngkong ka dei ha ka 12 tarik Naitung ha kaba kumba 800 tynrai bad ha ka 18 tarik mynta u bnai (Nailar) ki Karbi kiba la wan kham bun ngut ryngkat ka seng Karbi Students Association (KSA) ki la phut palat 4,000 tynrai. Da kane ka la pynlong ïa katei ka jaka ban nym shngaiñ shuh kat haduh ba ka sorkar Meghalya bad Assam ki la phah da ki pulit mar shiliang ban pahara ïa katei ka jaka.
Kumta ban ai jingtip sha ki paidbah ka jylla, ka kynhun U Nongsaiñ Hima naduh Shillong ka la hiar sha shnong Lapangap ban ïakynduh ïa u Secretary Shnong Bah Monbha Pyrbet.
Ha kane ka jingïakynduh ïa u Secretary Shnong, u la ïalam sha ki lum kiba la thung ïa ki tynrai dieng kiba dang dep shah pynjulor shen ha ki jaitbynriew Karbi kaba jngai kumba 1 kilometre eiei na shnong sha katei jaka.
Ha ka jingïakren bad u Bah Monbha Pyrbet, u la ong ba kane ka jaka ka dei kaba la dei trai da ki nongshong shnong na Lapangap naduh hyndai hynthai, hynrei ki Karbi ki shu wan kam mynta hadien ba thung dieng. Nangta u la ïathuh ruh ba ha u snem 2019 ka jylla Assam ka la wan ban shna surok sha ki jaka jong ka shnong Lapangap kaba dei kham shaneng ka jaka ba thung dieng hynrei ka sorkar Meghalaya kam shym la leh eiei hadien ba la dep pyntip. Kumta katei ka jaka ba don surok ka la ioh noh ka Assam.
Namar kata, u don jingkyrmen ba ïa kane ka jaka kiba wan kam ki Karbi kin hap beit ha ka jylla Meghalaya ynda la pynbeit ïa u pud u sam hapdeng ki ar tylli ki jylla namar ki biang ïa ki kot ki sla.
