Nongstoiñ, Nailar 30
Ar ngut ki suba nongkhaïi drok ha ka 30 tarik mynta u bnai ki la shah kem noh ha ki pulit ka Anti Narcotic Task Force (ANTF) ka West Khasi Hills ha ryngkat kawei ka kali Maruti 800 kaba don ïa u Register Number ML05-N-0782 kaba la suba ba ki ju pyndonkam ban khaïi beaiñ ïa u drok.
U Superintendent of Police (SP) ka West Khasi Hills u la ong ba ïa kitei ar ngut la ïoh ban kem na kawei na ki jaka jong ka dong Mawïaban jong ka shnong Siejlieh ha West Khasi Hills.
Shuh shuh u la ong ruh ba na ka liang jong ki pulit ki la pynlong ïa ka jingtalasi kaba bniah katkum ki kyndon aiñ ïa kitei ki ar ngut bad kumjuh ïa katei ka kali kaba ki pyndonkam. Ha ka jingtalasi, la ïoh ban kurup ïa u drok heroin uba don ka jingkhia haduh 5 gram, bad la ïoh ruh ban kurup ka pisa kaba don 10,480 tyngka, ar tylli ki mobile phone, uwei u thyrnia lem bad ar tylli ki tyndong plastik kiba rit.
Ka khubor na u SP ka West Khasi Hills ka ong ruh ba ïa kitei ki ar ngut kiba la shah kem la pynrung da ka mukotduma hapoh ka kyndon aiñ jong ka NDPS Act bad ka jingtohkit ka dang ïaid shakhmat.
