![Ba ïashah ki kynthei Khasi bad kam trai ïa ki dukan bar jylla, ther tyngeh ka HNYF ïa ka longkmie bless-dkhar](https://unongsainhima.com/wp-content/uploads/2023/09/bless-dkhar-720x421.jpg)
Shillong, Nailar 31
Ka Hynñiewtrep National Youth Front (HNYF) East Khasi Hills ka la ther tyngeh ïa kawei ka longkmie kaba la tip kyrteng kum ka Kong Lasara Marbaniang kaba dei ka Organising Secretary jong ka seng ki nongdie madan ka Meghalaya and Greater Shillong Progressive Hawkers and Street Vendors Association (MGSPHSVA) kaba ka la ong ba ka jaka shong die jingdie kaba don ha Bimola ka hap hapoh ka jingpeit jingkhmih jong ka Municipal bad kaba la kyntait ruh ba ki nongshong die madan ki khlem shym lah ïarap ne kam trai ïa kita ki mar ki mata jong ki bar jylla hynrei ka dei hok ka jong ki.
Hadien ba ka Executive Committee (EC) jong ka Khasi Hills Autonomous District Council (KHADC) hapoh ka jingïalam jong u Chief Executive Member(CEM), Bah Pynïaid Sing Syiem ha ryngkat ka jingïadonlang ki ophisar bad ka Hima Mylliem ha ka Sngi Ba-ar ki la leit ban jurip ïa ka Ïewduh bad ïa ki nongdie madan ban khynra ïa ki kot ki sla ba donkam naduh ki ‘Trading License’ bad ki ‘Labour License’, hynrei ha katei ka jingleit khynra la ïohi ba ki kynthei Khasi ki la mih shakhmat ban kam trai ba ki dei trai ïa kitei ki dukan.
Haba kren sha ki lad pathai khubor ha ka shlem treikam jong ka seng kaba don ha Mawlai, u Bah Steve Raymond Khyriem uba dei u Secretary jong ka HNYF, u la ong ba ka jingong jong katei ka longkmie ba katei ka jaka kam dei ka jaka jong ka Hima Mylliem hynrei ka dei jong ka Municipal ka long kaei-kaei ka bym shongnia.
Na ka liang u Bah Bless Dkhar uba dei u President ka HNYF East Khasi Hills, u la ong ba hadien ka jingïohi ha ki lad pathai khubor ba katei ka longkmie ka la ong ba ka long kaba donkam ba ka KHADC ka dei ban pyntip shwa sha ki nongdie jingdie hashwa ka jingwan jurip sha ïew sha hat ka dei kaei ka bym ïahap satia.
U la ong ba kam dei ka kamram jong ka KHADC ban leit pyntip sha uwei pa uwei u nongshong ïew hashwa ban leit jurip haba katei ka jaka ka dei jong ka KHADC.
“Ka dei ka kam bad ka dei ka jaka jong ka KHADC bad ym da donkam eh ban da pyntip bad kum ka KHADC ka lah ban leit ha kano-kano ka por ban jurip”, la ong u Bah Bless.
U Bah Bless u la ong ba na ka liang jong ka seng ka la pynpaw ka jingsngew lyngngoh hadien ba katei ka longkmie ka la ong ba ka KHADC ka dei ban ïoh jingbit bad ban ïaid shwa katkum ka aiñ jong ka Municipal hashwa ban wan jurip ïa kitei ki jaka. Kane ka jingong jong katei ka longkmie ka la pynlong ïa ka seng HNYF ban buh jingkylli la hato katei ka jaka ka dei ka jaka jong ka Municipal ne jong ka Hima Mylliem bad u la ong ba katei ka longkmie ka dei ban da tip ïa u pud u sam bad ban tip ïa ka jaka hashwa ban kren.
“Mynno ka Bimola ka hap hapoh ka Municipal bad lada ka dei kumta naduh mynno ka Hima Mylliem ruh ka la aiti ïa ka surok Bimola haduh Garikhana ba kan dei jong ka Municipal?”, la buh jingkylli u Bah Bless.
U la kyntu ruh ïa ka Municipal ba lada ka tam pud shaduh ka bynta jong ka Hima Mylliem, na ka liang ka seng kan sa shim ïa ki sienjam ban leh ïa kaba donkam wat haduh u pud ban ïakynduh ïa kiba halor namar la ju ïohi ba ka Municipal ka ju kwah ban klun ïa ki jaka jong ka KHADC.
“Ngi maham tyngeh ïa ka Municipal ba kam dei ban mushlia ïa kato ka jaka kaba dei jong ka Hima Mylliem bad lada ka leh kumta, ngi ruh ngim banse ban pyni da ka lynti kaba dei ban ïaid”, la ong u Bah Bless.
U la ong ba kaba sngewsih ruh ka long ban ïohi ba ha ka por katei ka jingleit jurip, haba kylli ïa ki bar jylla ha kaba ïadei bad ka ‘Labour License’ bad ka ‘Trading License’, na ka liang kitei ki bar jylla ki la ong ba kim don satia hynrei kitei ki kynthei Khasi pat ki la mih shakhmat ban ïada ïa ki bar jylla bad ki la kam pat ba ki khlem ïada ne kdup ïa kita ki barjylla.
U la ong ba lada kitei ki longkmie ki dei kiba dei ki trai jong kitei ki dukan, ki dei ban pynshisha ïa ki kot ki sla jong ki ha KHADC kumba la ong da u CEM bad u la ong ba ha ki jaka jong ka Municipal kitei ki nongshong die madan lah ban leh katba ki mon hynrei hapoh ki jaka jong ka Hima Mylliem ba synshar da u Syiem ha ryngkat bad ki Myntri bad hapoh jong u Syiem bad ki Myntri, ki dei ki khun ki hajar bad u la ong ba hato ki barjylla ki dei ki khun ki hajar jong ka Hima Mylliem.
U la pynkynmaw ruh ba ka jingshah tan jong ki dkhot ka seng sha thanat ha ki bnai kiba la leit hadien ba ki la shah kynnoh ba ki la don bynta ban shoh bad pynkulmar ïa ki nongdie madan ha kaba u la ong ba kito kiba ai hajir ruh pyrshah ïa ki dkhot ka seng ki dei ki kynthei Khasi.
U la ong ba kum ka seng kam kwah ba ka Ïewduh kan long kum ka Khanapara, ka Jorobat, ka Byrni ha kaba ki Khasi kim don shuh hynrei la shong die dukan da ki bar jylla suda kiba la knieh ïa ka pliang ja jong ki Khasi.
U la ong ha ka por ka jingleit jurip lah mih da kawei ka Kong bad ha ka sngi kaba bud la mih sa da kawei ka Kong bad u la ong ba haduh katno phew kong shuh kin mih.
“Lada phi trei paradoh parasnam bad phi im maphi, ngi lei ngi kloi ban mih lada phi don jingeh hynrei mynta phi don hapoh katba ki bar jylla pat ki don hajrong, kaei ka ban jia ïa ka jaitbynriew jong ngi?”, la buh jingkylli u Bah Bless.