Shillong, Nailar 11
U President ka United Democratic Party (UDP) uba dei ruh u Myntri Sorkar, Bah Metbah Lyngdoh ha ka Sngi Ba-ar u la pynskhem ba ka seng jong u ka long kaba la khreh ban ïakhun ïa ka ilekshon shiteng samoi sha ka Shillong Lok Sabha “ha ryngkat ne khlem ka jingkyrshan” jong ka seng ba ïatehlok ha ka RDA, ka Hill State People’s Democratic Party (HSPDP).
Haba kren sha ki lad pathai khubor, u Bah Metbah u la ong ba ka UDP ka la dep rai ïa u kyrtong jong ka bad sdang ruh ïa ka jingïalap ilekshon ha ka kyrdan jong ki konstitwensi, watla ka Election Com-mission kam pat pynbna ïa ki tarik thep ‘vote’.
“Ngi la pynkhreh ban ïakhun ïa ka ilekshon. Ngi la dep ruh ban rai bad pynbna ïa u kyrtong bad ngi la ïaid shakhmat,” u la ong.
Haba kylli la hato ka rai ba la pynpaw da ka HSPDP ban ym kyrshan ïa u kyrtong ka UDP kan ktah ne em ïa ka seng, u la ong ba kan ym don jingktah eiei.
“Ngam don eiei ban ong halor ka HSPDP. Kata ka dei ka kam poh ïing jong ki.
Ngi la pynpaw kham mynshwa bad haduh mynta bad kim pat shym la wanphai biang sha ngi. Hynrei ryngkat ne khlem ma ki, ngi la ïaid shakhmat kum ka seng,” u la ong.
Halor ka Regional Democratic Alliance (RDA), une u khlieh nongïalam ka UDP u la ong ba ka seng kan ïaid hi marwei.
“Kumba ka long mynta, ngi ïaid marwei, ym hapoh ka lama jong ka RDA. Ka dei kum ka UDP marwei,” u la ong.
U Bah Metbah u la bynrap ba ka bynta ba kongsan jong ka seng kaba kan rah bad pynsngew sha ki paid nongthep ‘vote’ kan long ka jingstad bad jingtbit jong u kyrtong (ka seng) ha ka liang ka aiñ, kaba u la ong ba ka long “ka jingdonkam jong ka por” haba buh jingmut ïa ki jingwanrah jingkylla ki ban sa wan ha ka Ïingdorbar Parliament.
“Nyngkong eh, ngi long kiba donbok ban ïoh ïa u kyrtong uba tbit bha ha ka aiñ, kaba dei ka jingdonkam jong kane ka por. Da kiba bun ki jingpynkylla kiba la khmih lynti ha Parliament, kan long kaba eh ban sngewthuh ïa ki khlem ka jingstad aiñ. Kata ka dei kawei na ki jingkhlaiñ ba khraw tam jong ngi,” u la ong.
U la bynrap ba kum ka seng ‘riewlum, ka UDP ka buh hakhmat eh ïa ki jingmyntoi jong ka thaiñ.
