Shillong, Nailar 11
Ka Ïingkashari Megha-laya High Court ha ka sngi Ba-ar, kala pynksan ïa u Pa’iem Ainam Manik Syiem hadien ba ka KHADC ba synshar da ka Voice of the People Party (VPP) kala pynkheiñ ïa ka aiñ haba ka pynsangeh treikam.
Haba pynbna ïa ka hukum jong ki mukotduma, ka Ïingkashari u Justice W Diengdoh ka la ong ba ka KHADC kala pynkheiñ ïa ka kyndon 7 jong ka Khasi Hills Autonomous Dis-trict (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007.
Ha kane ka mukotduma, ka Ïingkashari kala bthah ïa ka KHADC ba kan thung biang ïa u Pa’iem Ainam Manik Syiem kum u Syiem ba pura ka Hima Mylliem haba kdat noh sharud ne pynïap ïa ka hukum ba thung ïa u Bah Alban Fredrick Syiem kum u Acting Syiem.
Ka kyndon 7 jong ka KHAD (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007, ka kren shai ba kano-kano ka jingujor pyrshah ïa u Syiem ka dei ban leit shuwa sha ka Dorbar Hima bad dei ban sngap ïa ka jingpynshai u Syiem hashuwa ban weng ïa u.
“Ka Proviso 1 jong ka kyndon 7 ka Act u 2007, ka ong ba kano-kano ka jingujor pyrshah ïa u Syiem ka dei ban leit shuwa sha ka jingtip jong ka Dorbar Hima. Ïa kane ym shym la leh satia. Ka kam jong ka KHADC ban sospon ïa u nongmudui kam ïeng satia hakhmat ka aiñ” ong ka Ïingkashari.
Halor ka jingthung ïa u Acting Syiem, ka Ïingkashari ka ong ba ka kyndon-8 jong ka Act 2007, ka kren shai ba dei ban thung ïa u Syiem Khynnah ne Deputy Syiem haba sospon ïa u Syiem.
Ka KHADC ka la thung pynban ïa u Alban Fredrick Syiem, haba pynpaw ba u Syiem Khynnah Mansan Manik Syiem u dei u para jong u Syiem ba shah sospon.
Ka Ïingkashari kala ong ba ka jingpynbna (notification) ka KHADC ka dei ka bym shong nongrim katkum ka aiñ bad ruh ka jingsoi tang da uwei u Executive Member, kaba long khongpong ïa ka kyndon 25 jong ka Act.
Da ka jingkdat noh sharud ïa ka hukum sospon ïa u Syiem, ka Ïingkashari ka ong ba ka mudui u Syiem Khynnah kam donkam shuh ban bishar bad un dang bteng ban long u Syiem Khynnah.
