Nongstoiñ, Nailar 11
Ar ngut ki samla shynrang kiba sah hapoh ka shnong Lawrapha ha West Khasi Hills kila khlad noh bad phra ngut ki la mynsaw hadien ka jingshah tied kynsan ha u pyrthat katba ki dang ïalehkai phutbol ha kawei ka madan ïalehkai ïa kaba la ju khot ka madan ‘Makrein’ kaba don hapoh ka shnong Mawsnapwir ha West Khasi Hills District.
Haba pyntikna ïa kane ka jingjia bad katkum ka khubor ba la ïoh lum na u Superin-tendent of Police (SP) ka West Khasi Hills la ong ba ha ka sngi Ba-ar jong ka taiew, ki pulit ka thanad Nongstoiñ kila ïoh ïa ka jingpyntip halor katei ka jingjia, ha kaba ar ngut ki samla ki la khlad noh bad 8 ngut kiwei pat ki la mynsaw na ka jingshah tied kynsan ha u pyrthat, kaba la ong ba la jia ha ka por kumba 3 baje janmiet.
Shuh shuh ka khubor na u SP ka ong ruh ba kitei ki samla kiba khlad ki kynthup ïa u Mickson Kshiar ba dang 18 snem ka rta bad u Cleverson Kshiar ba dang 19 snem ka rta.
La ong ruh ba hadien katei ka jingjia, ïa kitei kiba mynsaw la pynkit noh sha Civil Hospital Nongstoiñ bad sha St. Joseph Hospital ban pynïoh ïa ka jingsumar.
Ka khubor ba la ïoh lum na ki nongïalam shnong pat la ong ba kitei ki ar ngut ki samla kiba la khlad noh ki dei shipara kiba shu wan shong skul hapoh ka shnong Lawrapha ha WKH bad la ong ba ha katei ka sngi kila ïashim bynta ha ka jingïalehkai phutbol ha ryngkat kiwei de ki para nongïalehkai ha ka lympung Independence Cup bala pynïaid da ka Sport Club jong ka shnong Mawsngapwir hapoh katei ka madan.
