Shillong, Nailar 11
U State General Secretary ka BJP Meghalaya u Bah Wankitbok Pohshna ha ka sngi Ba-ar u la ong ba um kwah kren ne kynthoh eiei halor ka jingthoh kaba la paw ha ka kyrteng u President ka Yuva Morcha ka Meghalaya, kaba ong ‘Siat ïa kiba ïakhih’.
Haba kylli halor ka jingkren ba la kynnoh ba la ong da u President ka Yuva Morcha ka BJP Meghalaya “Siat ïa ki Nongïakhih”, u Bah Pohshna u la ong ba ngam don jingtip halor kane.
“Ngam don jingtip ïa ka jinglong jingman baroh kawei. Nga thikna ba ka seng ka la pynpaw shai ïa ka nongrim jong ka. Ngam kwah ban kren eiei halor ka ‘account’ shimet. Ki account ki lah ban shah hack, kumta ki nongïalam ki dei ban husiar bha,” u la ong.
Ha kawei pat ka liang, u la kyntait ïa ki jingkynnoh ba ka seng ka la sngap jar halor ka jingïakhih ha Jantar Mantar, da kaba ong ba ïa kane ka mat la dep ban ïakren.
“Kam don eiei kum kata. U Myntri ka tnad Kam Pohïing ka Sorkar Pdeng u la dei ban pynshai. Ka seng ka la ai ïa ka jingkren jong ka. Ka kam ka la leit sha ka ïingbishar, kumta ngim dei shuh ban ïakren ïa kane,” la ong u Bah Pohshna.
