Shillong, Nailar 11
Ka Hynñiewtrep Inte-grated Territorial Organi-zation (HITO) hapoh ka jingïalam u Bah Donbok Dkhar, President bad ki dkhot, ha ka 11 tarik u Nailar 2026, ki la leit buh da ka dorkhas ha u President ka Meghalaya Pradesh Congress Com-mittee, u Bah Vincent H Pala, ban phah tuklar sha u Rahul Gandhi, ban ïakren ha Parliament, ban dawa pyntreikam noh ïa ka Instrument of Accession (IOA).
Haba kren sha ki lad pathai khubor, u Bah Marius Malai, Assistant Publicity Secretary ka HITO u la ong, ba ka seng ka la wan ban buh ka dorkhas ha u Bah Vincent Pala, hadien ba ka ïohi ba ka Congress ka la mih ha surok ban ïakhih halor ka jingthmu pyntreikam ka Sorkar Pdeng ïa ka FCRA.
Kumta ka HITO ka kyrpad ba u Bah Pala, un phah kane ka shithi sha u Rahul, ba un ïakren ha Parliament ban pyntreikam noh ïa ka Instrument of Accession (IOA).
Na ka liang u Bah Donbok Dkhar u la ong, ba ka HITO ka la kyrpad ïa u Bah Vincent H Pala kum u nongïalam saiñpyrthei bad kum u President jong ka MPCC, ban kyntu ïa u Rahul Gandhi, u nongïalam ka Liang Pyrshah ha Parliament jong ka India, ban rah bad kren shai ha Parliament halor ka Clause 5 jong ki kyndon ka jingïateh jong ka Instrument of Accession (IOA), kaba la mynjur hapdeng ka Sorkar India bad ki Khasi States.
“Ngi ngeit ba ka long kaba dei ban kyrshan ïa ka jingpyrshah jong phi, ryngkat bad ki paralok jong phi, ban pynsngew sha ka Sorkar India ïa ki jingsngewkhia kiba jur jong ki paidbah riewlum bad ki jaidbynriew trai ri halor ki mat kiba ktah ïa ki hok bad ki jingmyntoi jong ki kynhun rit paid hapoh ka ri, khamtam eh halor ka jingpyrshah ïa ki jingtyrwa ban pynkylla ïa ka Foreign Contribution Regulation Act (FCRA),” la ong u Bah Donbok.
U la ong ba hadien ba ka HITO ka la ïohi ïa ka Congress, ba ki la mih paidbah ban pyrshah ïa kane ka jingtyrwa, ka HITO ka sngewdei ruh ban pynsngew sha ka seng Congress ïa kawei pat ka mat kaba ngi ngeit ba ka don ka jingïadei kaba jylliew bad ki hok bad ki jingïada jong u paid Hynñiewtrep.
“Ngi kyntu ïa phi Bah Vindent H Pala bad ka AICC ban pynsngew ïa ka jingbym pynurlong ïa ki kyndon jong ka Instrument of Accession (IOA) jong ki Khasi States,” la ong u Bah Donbok.
