Khliehriat, Nailar 31
Ki pulit ka East Jaiñtia Hills da ka jingïarap ki pulit ka Lakhipur, Assam ki la ïoh ban kem noh ïa uwei u briew uba dei u nongbei pisa ban thied ïa u drok ne kiwei ki jingdih buaid.
Ïa une u briew ba la tip kyrteng kum u Jhangir Alom uba na Lakhipur, Assam la ïoh ban kem noh ha ka 30 tarik mynta u bnai. Ïa une u briew la wallam noh sha Khliehriat bad ban leit hajir ruh hakhmat ka ïingkashari ha Khliehriat.
Kane ka la wan hadien ba ki pulit jong ka East Jaiñtia ki la pynlong ka jingtohkit kaba bniah bha ha ka jingïadei bad ka Khliehriat PS Case No. 48 (6) 2023 u/s 21 (c)/29 NDPS Act.
Ha ka kyrwoh khubor ba la pyllait da u Superintendent of Police ka East Jaiñtia Hills u Jagpal Singh Dhanoa, IPS, u la pynkynmaw ba ha ka 19 tarik u Jylliew 2023, ki pulit ka East Jaiñtia ki la ïoh ban kem ïa arngut ki nongkhaïi drok kiba la tip kyrteng kum u Biaklian Guite bad u Imliakum Longkumer, napoh petrol pump BMS, Nongsning katba ki dang wan da ka kali Tata Winger kaba don ïa u Regn No. NL07-T-0815 ha kaba ki pulit ki la ïoh ban kurup noh na ki ïa u drok Heroin uba don haduh 2.738 kilo.
Kine kiba la shah kem, kata u M. Tuanbiaklian Guite 32 snem u dei na Churachandpur, Manipur katba u Imliakum Longkumer 40 snem na Dimapur, Nagaland katba u Jhangir Alom 34 snem na Lakhipur, Goalpara, Assam.
