Shillong, Nailar 31
U Chief Executive Member ka Khasi Hills Autonomous District Council (KHADC), Bah Pynïaid Sing Syiem u la kren shai bad mana tyngeh ïa ki ’thei Khasi kiba pyrshang ban ïada ïa ki nongkhaïi bar Jylla bad u la ong ba ka jaiñkyrshah kaba ki ’thei Khasi ki phong kan ri ïa ka burom ym ba ka jaiñkyrshah kan ïada bad kdup ïa ki poi ei.
U Bah Pynïaid u la pynpaw ïa kane hadien ka jingïakynduh jong u lem bad ki EM ïa ka synjuk Hynñiewtrep Nongïew Association kaba la wan ban ïakynduh ban ai khublei ïa ka Executive Committee haba ïadei bad ka jingjurip ïa ka Ïewduh khamtam eh ha khlieh ïew bad ka jingkular ban shim ïa ki sienjam ban wanrah ka khuid ka suba hapoh ïew.
U Bah Pynïaid u la ïathuh ba ka jingleit sha Ïewduh ka dei na ka bynta ban sngewthuh ïa ka shongsuk shongshngaiñ namar la ïoh ki jingujor ba bun ki kam sniew ki jia ha ïew kynthup ki kam tuh.
U la ong ba la lap ba ka jaka ïeng kali jong ka MUDA ha khlieh ïew ka don jingduna naduh ka jingjaboh, bad lada set kali ruh kam don jingshngaiñ satia.
Kumta u CEM u la ong ba ka KHADC ka la ïakren bad ka Sorkar MDA ha kaba la pyntip ba yn sa sdang ïa ka projek ban pynbha ïa ka jaka ïeng kali ha khlieh ïew bad ïa ka kam yn sdang noh shen.
Halor ka jingjaboh ha Ïewduh shaduh Motphran, u CEM u la ong ba ha ka por ba leit jurip, la lap bun kiei kiei naduh khlieh ïew shaduh Motphran.
“Ngin pyntreikam ïa ka skhim ‘tied grant’ hapoh ka solid waste management ha kaba ka wat banyngkong ka dei ka jingpyllait ïa ki trok kit ñiut, ka wat ba-ar ka dei ka jingpynkhuid ïa ka Ïewduh bad ka wat balai ka dei ka jingpynsngewthuh halor ka khuid ka suba ban pynneh ïa ka jingkhuid ha ïew,” la ong u Bah Pynïaid.
Shuh shuh u la ïathuh ba hadien ka jingleit jurip ïa ka khlieh ïew bad Motphran, la thaw ruh ïa ka Committee ban peit ïa ka khuid ka suba ha Ïewduh. Ïa kane ka Committee yn khlieh hi da ma u kum u CEM ha ka jingdonlang ki EM, u ADC ka East Khasi Hills, ki ophisar ka tnat Urban Affairs bad ki Rangbah Shnong jong 6 tylli ki shnong ba marjan bad ka Ïewduh nalor u Syiem ka Hima Mylliem.
Haba kren shai ba baroh kiba khaïi ha Ïewduh khlem kot khlem sla kim lah ban khaïi, u CEM u la ong ba ka long kaba sngewsih ban tip ba ki ’thei Khasi ha ryngkat ki jaiñkyrshah ki mih ban kam trai ïa ki jingdie bad ki tiar jong ki bym dei Khasi.
Kumta u la mana da kaba ong, “ki ’thei Khasi, bad ka jaiñkyrshah kaba ki phong ka dei ban ri ïa ka burom jong ka jaitbynriew ym ba ka jaiñkyrshah kan ïada bad kdup ïa ki poi ei.”
