Mawkyrwat, Nailar 31
Palat spah ngut ki nongrep kiba don ha ka thaiñ Ranikor Block, South West Khasi Hills District ki la shah ktah na ka jingshah pynjot ki mar rep ha ki hati khlaw bad kumba 50 tylli eiei ki ïing kynthup ïa ki ïing ha ki jaka rep bad ki ïing briew ki la shah ktah ha kane ka jingwan thombor hati khlaw kiba la suba ba ki dei kiba wan phetwir na ki thaiñ Rilum Garo.
Ïa kane la ïathuh da ki nongïalam ka Ranikor Area Farmers Association (RAFA), Bah Micheal Donald Lyngdoh kum President bad u Bah Kyrmen K Ryja kum Secretary.
Na ka liang ki nongïalam ka RAFA hadien ka jingïalang ki nongrep kaba la pynlong ha Nongnah namar ka jingsngew sohsat halor ka jingshah pynjot ki jingthung jingtep ha kajuh ka por kaba buh jingma ruh ïa ka jingim jong ki, ha ka 31 tarik u Nailar 2023 ki la leit ban ïakynduh ïa u Deputy Commssioner jong ka South West Khasi Hills, Bah T Lyngwa ban pynsngew ha u ïa kane ka jingeh ki nongrep bad ki la ai ruh da ka kot jingthoh ban kyrpad ïa ka sorkar ba ka dei ban thaw ïa ki lad ki lynti ban pynkynriah noh ïa kine ki hati khlaw kiba la don mynta la kumba ar snem eiei ha ka thaiñ Ranikor.
U Bah Micheal Donald Lyngdoh haba ai jingkren sha ki lad pathai khubor u la ïathuh ba la ar snem kitei ki hati khlaw ki la wan ban pynjot ïa ki jingthung jingtep hynrei ym shym la don mano-mano ba wan ai jingïarap ne wan jngoh ïa ka jingeh ki nongrep.
U la ïathuh ba ki bor ka tnat Wildlife ki la shimkhia ïa kane ka kam, ki la wan ban sah miet bad beh ruh ïa ki hynrei kaba sngwsih ka long ba kine ki hati ki phet tang shipor bad katba nang beh kitei ki hati ki la nang bun.
Kumta na ka liang ka RAFA ka la ai por tang shibnai ïa ka sorkar jylla ba ka dei ban thaw ïa ki lad ban pynkynriah noh mardor ïa kine ki hati. Nalor kata, ka la maham ruh ba lada ka sorkar kam lah ban leh eiei, ki nongrep kim banse wat ban pynjot ïa kine ki hati.
