Shillong, Nailar 31
U Myntri Rangbah ka jylla, Conrad K Sangma u la khot ïakren ïa ka seng Hynñiewtrep National Youth Movement (HNYM) ha ka 4 tarik u Nailur 2023 ha ka por 2:30 noh phai sngi ha shlem treikam jong u ha Secretariat ban ïakren halor ka jingdawa jong kane ka seng halor ka jingkyrduh kam ki samla.
Ïa kane ka jingkhot ïakren u Conrad K Sangma, la pynpaw da u President ka HNYM haba ai jingkren hakhmat u mot Kiang Nangbah hajan ka Civil Hospital Shillong hadien ba ki la shah khang lynti noh ha ki pulit haba ki thmu ban leit tur sha Secretariat.
Ki dkhot jong ka seng HNYM kiba la poi palat 400 ngut ryngkat ki lama saw bad ki jingthoh ki la ïalum hakhmat u mot Kiang Nangbah mynta ka Sngi Palei ban dawa na ka sorkar ba kan thaw ki lad ki lynti ban aikam aijam ïa ki samla hynrei hashwa ba kin ïaid paidbah ban tur sha Secretariat ki pulit kiba la pahara bha ki la khang lynti noh ïa ki.
Hadien katto katne kynta haba u Conrad K Sangma u la khot ïakren ïa ki ha ka 4 tarik u Nailur 2023, ki nongïalam ka HNYM ki la ïalam noh ïa ki dkhot da kaba ïaid da kaba jai-jai na Keating Road, Khyndailad, Motphran ban pynkut sha Jaïaw da ka jingsynranlang ki pulit khnang ban nym jia eiei ïa kiba shong dukan ne kiba ïaid ha lynti syngkien.
Haba ai jingkren kum u President ka HNYM, u Bah Louis Dohtdong u la ong ba ka jingbym donkam ki samla kiba la pyndep ïa ki jingpule ka la pynlong ïa ki ban ngop ha ki jingdih pynbuaid khamtam u drok.
U la ong ba ka kyiad ka la syllad ïa ki khun samla namar ki dukan die kyiad ki don palat 827 tylli, kata 800 tylli tang ha ka bri u hynñiewtrep katba 27 tylli ki don ha Rilum Garo. Kane ka pyni ba ka sorkar ka thmu ban pynïap ïa ki samla da kaba pynbun ki dukan kyiad.
U la ong ba ka jingkyrduh kam ka la pynlong ïa ki samla ba kin sniew jinglong ba kin hap leh ïa ki kam bym ïahap ïa ka imlang ka sahlang.
“Lada ka sorkar kam lah ban pynbeit ïa kane ka jingkyrduh kam, ka seng nangne shakhmat kan khynra ïa ki bar jylla kiba wan bylla hapoh ka jylla ha baroh ka bri hynñiewtrep namar ki bym biang kot ngin kyndang lut naphang” u la ong.
Nalor kane, u la maham ïa ki Rangbah Shnong ba kim dei shuh ban ai jingbit ïa ki bar jylla ban seng kam lajong hapoh ka bri u hynñiewtrep namar ka KHADC kam lah ban ai laisen khaïi khlem ka jingbit na ka Dorbar Shnong.
Ha kajuh ka por u la pyntip ba kum ka jingïatreilang bad ki bor sorkar, ka seng ka la kohnguh ban ïaid da kaba jai-jai na Keating Road sha Khyndailad shaduh Motphran da kaba kiar noh ïa ka Secretariat namar ka seng kam kwah ban pynthohbria ha ka jingïaid lynti jong ka.
