Shillong, Nailar 31
U Chief Executive Member (CEM) ka KHADC, Bah Pynïaid Sing Syiem u la kren shai ba ka Relief and Rehabilitation Colony ka hap ha u pud synshar jong ka Dorbar Shnong Rynjah bad kino-kino ki jingai syrnot kynthup ka No Objection Certificate (NOC) ban khaïi.
Haba kren sha ki lad pathai khubor hadien ka jingïakynduh bad ki nongkitkam ka Dorbar Shnong Rynjah, u Bah Pynïaid u la ong ba ka jingïakynduh ka dei halor ar tylli ki mat; kawei halor u pud synshar ka Dorbar Shnong Rynjah kaba kynthup ïa ki kam khaïi jong ki bym dei Khasi.
U la ong ba ïa ka R&R Colony ha Rynjah la tip da ka kyrteng kum ka Them Rynjah bad ha u snem 2019 ka Dorbar Shnong Rynjah ka la kyrpad ïa ka KHADC bad Hima Mylliem ban ithuh ïa ka R&R Colony hapoh u pud synshar ka Dorbar Shnong Rynjah.
U la ong ba ha ka 1 tarik Rymphang, 2019 ka Hima Mylliem ka la pynmih ka jingpynbna ba u pud synshar ka shnong Rynjah ka kynthup lang ïa ka R&R Colony.
U Bah Pynïaid u la ong ba ka Council ka la pynskhem ïa kane haba ïadei bad ka jingpynbna jong ka Hima Mylliem ha kaba la bthah ruh ïa ki nongshong shnong la ka dei labour license, trading license bad syrnot nongshong shnong ki hap ban shim na u Rangbah Shnong Rynjah.
Nalor kane, u la ong ba ka DS Rynjah ka kyndit ban tip ba ki don kita ki kot ki sla kiba la soi naduh 2007 ban ai syrnot khaïi lyngba ka Relief and Rehabilitation Colony Social Welfare Society ha kaba la pynsngew ba ka ai NOC ban leh ki kam khaïi ha katei ka thaiñ.
Na ka liang ka Dorbar Shnong Rynjah ka kren shai ba ïa ka R&R Colony la dep ai kyrteng kum ka Them Rynjah bad baroh ki bym dei Khasi kiba sah hangtei ki hap shim NOC na ka Dorbar Shnong Rynjah ym na kata ka Society.
Na ka liang ka Executive Committee ruh ka la pyntip sha ki paidbah ba ka R&R Colony naduh u snem 2019 ka hap ha u pud synshar ka Dorbar Shnong Rynjah bad kito ki bym dei na ka jaitbynriew Khasi kim lah ban long Rangbah Shnong bad la rai ruh ban shim bad ithuh ïa ki syrnot kiba ai da ka Dorbar Shnong Rynjah.
Kumta u CEM u la ong ba lada don ba pynkheiñ wat hadien ka jingpynbna kaba la pynmih da ka Hima Mylliem, ka KHADC kan sa leh katkum ka aiñ.
Na ka liang u Rangbah Shnong ka Rynjah, Bah Eddie V War u la bynrap ba ka Dorbar Shnong Rynjah naduh u snem 2019 ka la pynïaid ïa ki kam katkum ki kyndon ha kaba ka R&R Colony ka hap hapoh ka jingpeit jingkhmih ka Dorbar Shnong Rynjah.
U la ong ba ka Dorbar Shnong kam pyrshah ïa ka jingtreikam kata ka Society haba ïadei bad ka kam niam bad imlang sahlang, hynrei kaba shai ka long ba ka Society kam lah satia ban ai NOC haba ïadei bad ki kam khaïi bad ka hap ban shim jingbit da ka Dorbar Shnong Rynjah kumba la pynbna da ka Hima Mylliem bad ithuh da ka KHADC.
