Shillong, Nailar 31
Ka Voice of the People Party (VPP) ka la buh ka jingkyntu sha baroh 4 ngut ki MLA jong ka, ba ïa ki skhim MLA dei ban pyntreikam ha ka rukom kaba khuid bad haba shit ba shai bad kumjuh ruh ban pynbiang ka kaiphod man la ka por sha ki paidbah.
Ha kaba ïadei bad kane, na ka liang u General Secretary ka VPP, Dr Ricky AJ Syngkon ha ka shithi ba la phah sha baroh ki MLA ka seng ha ka sngi Palei u la ong, ka State Executive Committee (SEC) ha ka jingïalang ba long ha ka 20 tarik u Nailar, la ïoh ban ïathir sani bha halor ka MLA skhim bad ha kaba la shim ïa ka rai ban pyntip sha baroh ki MLA jong ka seng ba kin leh ïa kaba donkam.
U la ong ba kum ki MLA ka seng ki dei ban pyntikna ba ïa ki MLA skhim dei ban pyntreikam haba shit haba shai bad ban ai ruh ïa ka kaiphod kaba bniah bad pura sha ki paidbah manla ka por.
Nalor kane, la pyntip ruh ba ka State Executive Committee ka la kyntu ïa ki MLA ban pynthikna ha ka ban shim ïa ki TA/DA bad ka bai shong jingïalang kum ki dkhot jong kino-kino ki Assembly Committee katkum kaba dei rukom bad ban pynthikna ruh ba kino-kino ki jingpynbha ne maramot ïa ki MLA hostel ba la ai sha baroh ki MLA ki dei ban long kiba ïahap bad shong nongrim.
U Dr Ricky u la ong, “La kyrpad ïa baroh ki MLA ba kin shimkhia ïa kine ki mat ba la wanrah da ka SEC bad ban pynthikna ba kin pyntreikam ïa ka rai kumba ka long na ka bynta ka bha ka miat ki paidbah bad ka Jylla baroh kawei.”
