Shillong, Nailar 31
Kum shi bynta ban ïaleh ban wanrah biang ïa ka shongsuk shongsaiñ ha ki shnong khappud ka Khanduli, na ka liang jong ka Karbi Students’ Association (KSA) bad ka Jaiñtia Students’ Movement (JSM) ki la ïoh ban thaw da kawei ka komiti ban ïatreilang ryngkat-ryngkat.
Kane ka komiti ba la thaw nalor ka jingïaleh ban wanrah ïa ka jingsuk ha ki shnong khappud ka Khanduli, kan ïaleh ruh ban tem noh ïa ka jingïakynad hapdeng ki paid Khasi-Pnar bad ki Karbi kiba sah ha khappud.
Katei ka komiti ba la thaw da kitei ar tylli ki seng la tip kum ka ‘Students Committee for Peace Initiative’. La thaw ïa kane (komiti) ha ka jingïalang kaba la pynlong ha ka sngi Palei ha Diphu, kaba hap hapoh Karbi Anglong District.
Kane ka dei ka sienjam ba la shim ban lah wanrah biang ïa ka jingïasuk hapdeng kine ki jaidbynriew (Khasi-Pnar bad Karbi) kiba shong ba sah ha ki jaka khappud ka West Karbi Anglong, Assam bad ruh kiba na West Jaiñtia Hills, Meghalaya.
Ka jingthmu jong kane ka komiti ka long ban ïapynbeit ïa ki mat bapher-bapher kynthup ki jingïapher jingmut, ki jingïasngewthuh bakla, ki jingïakajia barit-baria bad kiwei-kiwei ki kam kiba lah ban thaw ïa ka jingïakynad bad jingsngew ïapher hapdeng ki Pnar bad ki Karbi kiba sah ha khappud.
