Shillong, Nailar 31
Ka Hynñiewtrep Ïewduh Association ha ka Sngi Balang ka la leit ban ïakynduh ïa u Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem ban pynsngew ha u ïa ki jingeh kiba kum ki nongïew ki mad khamtam ha kaba ïadei bad ka shongsuk shongshngaiñ, ka jingwanrah ïa ka jingshai kum ka bording bad ka jingkhuid jingsuba hapoh ïew hapoh hat baroh kawei khnang ba ki kam sniew kiba bun kin nym ïohlad ban nang kharoi.
Haba kren sha ki lad pathai khubor, u Bah Korbar L Nonglait uba dei u President jong ka Hynñiewtrep Nongïew Association, u la ong ba hapoh ka jingïalam jong u Pa’iem Ainam Manik Syiem kum u Syiem ka Hima Mylliem u khmih lynti ba nangne shakhmat utei u Syiem un ïatrei ryngkat lang bad ka District Council khnang ba ka ïew ka hat kan kylla long noh da kawei ka dur ym ba kan ïai long kum ha ki sngi bad ki por kiba la dep.
Ha kaba ïadei pat bad ka jingmih jong ki kynthei Khasi ban kam trai ïa ki dukan jong ki bar jylla ha ka por ba ka KHADC ka leit ban khynra ïa ki kot ki sla jong ki bar jylla, utei u President u la ong ba haba leh ïa kano-kano ka kam kaba bha, ki ju don beit kiba wan pynthut kiba long ki nongwoh kjat.
Utei u President u la ther tyngeh ruh ïa kito ki kynthei Khasi kiba mih shakhmat ban ïada ïa ki bar jylla ha kaba u la ong ba kitei kynthei kim don hok ba kin shu balaiñ stad bad khang ïa ka jingwan jong ka KHADC, hynrei na ka liang ka kynhun jong ka Hynñiewtrep Ïewduh Association ka ai ka jingkyrshan kaba pura ïa ka KHADC ba kan ïaid shakhmat bad kane ka jingkhynra ïa ki kot ki sla jong ki bar jylla bad ka jingleit jurip ïa ka jinglong jingman jong ka ïew.
U la ong ba ka jaka kaba ki nongshong die madan ki shong hajan Bimola ka dei kaba dang hap hapoh ka jingpeit jong ka Hima Mylliem ym jong ka Municipal bad u la ong ba ka jingkren jong kato kawei ka kynthei Khasi ba katei ka jaka ka hap hapoh ka jingpeit jong ka Municipal ka long kaba bakla.
Na ka liang ka Kong Mary Victoria Marweiñ kaba dei ka Vice President jong ka Hynñiewtrep Nongïew Association, ka la ong ba ka jingmih jong ki kynthei shakhmat ha kato ka sngi ka dei ka jingkren laplah bad ka la ong ba kan nym aili ïa kitei ki kynthei Khasi kiba ïashah bar jylla ba kin pynthohbria ïa ka Ri Khasi.
“Mynta ba kin ktah bad ba kin kynthoh ïa ka Hima Mylliem bad ïa ka District Council, ngi ki seng ngin nym aili, ngin nym aili ïa kum kito kiba pynthohbria ïa ka Ri Khasi jong ngi”, la ong ka Kong Marweiñ.
Ka la ong ba kiba bun ki Khasi wat ba kin shong die jingdie barit baria ruh kim ïoh ha surok katba ki bar jylla pat ki ïoh thik-thik ban die.
Shuh shuh ka la ong ruh ba lada don kano-kano ka jingjia hapdeng u bar jylla bad u Khasi, u ju shah kem beit u Khasi bad kitei ki kynthei Khasi ki la shu ai pulit ïa ki Khasi lade, hynrei ha ka jingshisha kum ka longkmie ka dei ban long kum ka longkmie ban mih na ka bynta ka ri bad ka jaitbynriew.
“Kum ka longkmie phi dei ban long kum ka longkmie ban mih na ka bynta ka ri bad ka jaitbynriew, lada ki longkmie ki long ha kato ka rukom, ka ri bad ki khun jong ngi shano kin leit namar ba ki khun shynrang jong ngi ki dei ka waitlam bad ngi ki kmie, ngi dei ka stieh ban ïada ïa la ka ri”, la ong katei ka Kong Marweiñ.
