Shillong, Nailar 31
Ka Khun Hynñiewtrep National Awakening Movement (KHNAM) haba pynpaw ïa ka jingsngewkhia, ka la ong ba u MLA jong ka South Shillong Constituency, Bah Sanbor Shullai bad u MLA ka Pynthorumkhrah Constituency, Bah A.L Hek kim don satia ïa ka bor ban thung Rangbah Shnong.
Ha ka kyrwoh ba la pyllait ha ka sngi Palei, u Working President ka KHNAM u la ong, “U Bah Sanbor bad u Bah A.L Hek kim don satia ïa ka bor ban thung Rangbah Shnong, lada peit katkum ki kyndon aiñ ba la don, namarkata ka KHADC ka dei ban pan jingshai na kine ki ar ngut ki MLA halor ka jingai bor jong ki ïa u bar jylla ban long Rangbah Shnong bad ban ai No Objection Certificate (NOC).”
“Lyngba ka jingleit khynra laisen khaïi (trading License) jong ka seng HITO ha ki thaiñ Rynjah, ka long kaba sngewlyngngoh ban ïohi ba ka KHADC ka ai laisen khaïi ïa ki bar jylla lyngba ka NOC ba la soi da u bar jylla uba la kam ïa lade kum u Rangbah Shnong jong ka RR Colony,” la ong ka KHNAM.
Katkum ka “The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act 2007” ka la batai shai kdar ba u Rangbah Shnong “ka mut u Khasi uba la shah jied da ki nongshong shnong jong ka shnong kaba hap hapoh u pud u sam jong ka Hima Mylliem, bad dei tang u Khasi uba lah ban long u Rangbah Shnong”. Ka long kaba shai ba u bar jylla um lah ban long Rangbah Shnong katkum kane ka aiñ, la bynrap ka kyrwoh.
Shuh shuh na ka liang ka KHNAM haba kynthoh jur, ka la buh jingkylli ruh ïa ka KHADC, halor kano ka nongrim la pdiang ïa ka NOC ba la soi da u bar jylla kum u Rangbah Shnong? Kane ka pynpaw ba ka KHADC hi ka pynkheiñ ïa ka aiñ jong ka Hima Mylliem bad la shu ai thurmur ïa ka Trade License lyngba ki NOC ki bym biang tang ban biang mano-re-mano shimet.
