Shillong, Nailur 01
Ki nongshong shnong ka Lapangap ki la pynpaw ba kam don jingmut ïa ka sorkar ba kan buh ïa ki pulit ha Lapangap namar ki khlem leit ap haduh ka jaka ba wan jynrat ki Karbi ïa ki tynrai dieng kiba la thung da ka shnong hynrei ki leit shong ha ïingdorbar shnong kaba jngai kumba shi kilometer na katei ka jaka.
Haba u nonglum khubor U Nongsaiñ Hima u la poi sha ka shnong Lapangap u la leit beit-beit sha ki lum ba la thung tynrai dieng da ka shnong kaba la shah jynrat ha ki Karbi. Te hynrei la ïohi ba ki pulit Meghalaya ki ïeng ha jaka ba kham pyngngad kaba don ki dieng ha syndah ka shnong namar kine ki lum ba la thung tynrai dieng ka dei ka jaka ba kham madan.
Katba na ka liang ki paidbah kiba la pynpaw ha u nonglum khubor ki la ong ba naduh ba mih kane ka huri-hura kim nud shuh ban leit trei sha ki lyngkha lajong kiba don sha jaka ba la thung ïa ki tynrai dieng namar kim shngaiñ shuh.
Nalor nangta ki la ong ba ka sorkar ka la phah ïa ki pulit ban leit pahara haduh kitei ki lum ba la dep thung dieng da ka shnong Lapangap, hynrei ki shu wan ban pahara tang mynsngi da kaba shong ha ka jaka ba don ki dieng pynban kim leit ap haduh u lum ba thung ïa ki tynrai dieng, katba mynmiet pat ki leit ban sah noh ha ïingdorbar shnong.
Namar kata, ki nongshong shnong ka Lapangap ki la pynpaw ba kam myntoi ban buh pulit lada kim lah ban leit shong ne leit ap ha jaka ba thung tynrai dieng namar ki Karbi kin sa wan phut biang ïa ki tynrai dieng ba la dep thung da ka shnong Lapangap.
Kum ban shu kdew, ha ka Sngi Palei la ïohi ba ka sorkar ka la phah kham bun ki pulit ban sah ha Lapangap bad la ïohi ruh ba ki pulit ki la leit pahara kham bun ryngkat ki tiar ïaleh ban leit pahara ha ki lum ba la thung tynrai dieng.
